کیوں منہ تکوں نہ دیدۂ حیرت سے چاہ کا

کیوں منہ تکوں نہ دیدۂ حیرت سے چاہ کا

آئینہ روئے یار بنا ہے نگاہ کا

جب آپ ہی کو پاس نہیں رسم و راہ کا

کیا فائدہ جو ہو بھی ارادہ نباہ کا

سوز دروں سے جل کے ہے سرمہ جو میری خاک

آنکھ ان بتوں کی مجھ کو ہے گوشہ پناہ کا

یوں بے حجاب بام پہ آیا نہ کیجیے

قابو میں دل رہے گا نہ اک اہل راہ کا

تکلیف دست و تیغ اٹھانے سے فائدہ

کافی ہے میرے قتل کو خنجر نگاہ کا

یوں جستجوئے یار میں ہے بیقرار دل

بھولا ہوا پھرے کوئی جس طرح راہ کا

بیگانہ بن کے پوچھتے ہیں حال رحمتیؔ

تا جس میں ہو ارادہ نہ ظاہر نباہ کا