قافلہ ارمان و حسرت کا ہمارے دل میں ہے

قافلہ ارمان و حسرت کا ہمارے دل میں ہے

جب سے اس منزل میں آیا ہے اسی منزل میں ہے

آرزو وہ ہوگی پوری جو دل بسمل میں ہے

آستینیں چڑھ چکیں خنجر کف قاتل میں ہے

ہو گیا زائل اثر کیا انقلاب عشق کا

آرزو جو دل میں میرے تھی وہ اب تک دل میں ہے

جان پر اب ہے نظر پہلے تھی دل پر ہی نگاہ

پہلے دل مشکل میں تھا اب جان بھی مشکل میں ہے

جو چراغ کعبہ و بت خانہ سے کچھ کم نہیں

وہ منور داغ الفت کا ہمارے دل میں ہے

دم کبھی الجھے ہجوم غم سے یہ ممکن نہیں

اے خیال یار جب تک تو ہمارے دل میں ہے

دیکھ لے قاتل نگاہ ناز سے پھر اس طرف

اک ذرا سا دم ابھی باقی تن بسمل میں ہے

آپ اگر اس کو نکالیں تو عنایت آپ کی

آرزو مچلی ہوئی بیٹھی ہمارے دل میں ہے

صاف باطن ہم سے بڑھ کر کوئی اے بریاںؔ نہیں

وہ زباں سے بھی نکلتا ہے جو اپنے دل میں ہے