واعظ ترے لیے ترا ایماں ہے زندگی

واعظ ترے لیے ترا ایماں ہے زندگی

میرے لیے تو جلوۂ جاناں ہے زندگی

اک جنبش نگاہ کی مہماں ہے زندگی

ساقی تری نگاہ میں پنہاں ہے زندگی

ہنس کر کے دیکھنا ترا چلمن سے جھانک کر

اتنی سی بات پر میری نازاں ہے زندگی

اے جان نو بہار سکون دل و جگر

گر تو نہیں تو بے سر و ساماں ہے زندگی

بن ٹھن کے کس طرح سے وہ نکلے ہیں گھر سے آج

ہر اک ادائے دوست پہ قرباں ہے زندگی

اے یاد یار کیوں نہ مجھے دل میں بٹھاؤں

تیرے بغیر بس میری ویراں ہے زندگی

ہو جائے اے امیرؔ جو اپنے نصیب میں

مستی بھری نگاہ کا پیکاں ہے زندگی