حکمت سے یہ خالی نہیں لبریز ساقی جام کر

حکمت سے یہ خالی نہیں لبریز ساقی جام کر

دور و تسلسل میں نہ پھنس دیوانگی میں نام کر

کہتے ہیں تجھ سے بے خبر اوقات کو ضائع نہ کر

جو کام کل آوے ترے سو آج تو وہ کام کر

جو جو بلائیں آفتیں آتی ہیں تیری جان پر

تو جان ہی سے ہاتھ اٹھا پھر شوق سے آرام کر

داغ جگر کے یہ دیے چاہے کہ تو روشن رہیں

اس روشنی کے چرخ میں تو روغن بادام کر

مقصود اگر منظور ہے رونا اگر مطلوب ہے

لے شام سے تا صبح کر پھر صبح سے تا شام کر

سن بات تو یہ عشق کی اے شیخ اگر دانا ہے تو

رزاق ہے روزی رساں تسبیح کو مت دام کر