لے گیا دل چھین کر دل دار اپنے ہاتھ سے

لے گیا دل چھین کر دل دار اپنے ہاتھ سے

مجھ کو گھائل کر گیا وہ یار اپنے ہاتھ سے

میں تو سویا تھا پڑا خواب عدم میں چین سے

خود بہ خود مجھ کو کیا بیدار اپنے ہاتھ سے

فرقت ہمدم میں جینے کا بھروسہ کچھ نہیں

ہائے زخمی کر گیا خونخوار اپنے ہاتھ سے

لگ گئی عشق بتاں کی آگ جس کو اے میاں

پھونک ڈالا اس نے سب گھر بار اپنے ہاتھ سے

گر نہیں منظور تجھ کو وصل اے قاتل مرے

پھیر دے حلقوم پر تلوار اپنے ہاتھ سے

لاش میری دیکھ کر کہنے لگا وہ ترش رو

دفن کر دیں گے اسے سو بار اپنے ہاتھ سے

نبض میری دیکھ کر بولا طبیب رازداں

دے کے دل اس نے لیا آزار اپنے ہاتھ سے

یا معین الدین چشتی بحر غم میں ہوں پڑا

اپنے بندے کو کرو تم پار اپنے ہاتھ سے

میراںؔ شاہ روز حشر کو جام کوثر کا میاں

دیں گے تجھ کو حیدر کرار اپنے ہاتھ سے