ادا سے دیکھ لو جاتا رہے گلہ دل کا

ادا سے دیکھ لو جاتا رہے گلہ دل کا

بس اک نگاہ پہ ٹھہرا ہے فیصلہ دل کا

وہ ظلم کرتے ہیں مجھ پر تو لوگ کہتے ہیں

خدا برے سے نہ ڈالے معاملہ دل کا

ہزار فصل گل آئے جنوں وہ جوش کہاں

گیا شباب کے ہم راہ ولولہ دل کا

بہار آتے ہی کنج قفس نصیب ہوا

ہزار حیف کہ نکلا نہ حوصلہ دل کا

خدا ہی خیر کرے آج رنگ بے ڈھب ہے

بھٹک رہا ہے کئی دن سے آبلہ دل کا

پھرا جو کوچۂ قاتل سے کوئی پوچھیں گے

سنا ہے لٹ گیا رستے میں قافلہ دل کا

خدا کے سامنے اپنا ہے اے قلقؔ انصاف

بتوں سے حشر میں ہوگا معاملہ دل کا