کچھ تھی تو جذب عشق میں یہ تھی خوشی مری

کچھ تھی تو جذب عشق میں یہ تھی خوشی مری

ہوتی تمہارے در پہ ادا بندگی مری

میں کیا کروں کہ عظمت غم کا سوال تھا

قربان ہو گئی ترے غم پہ خوشی مری

میرا جنوں ہے ان کی تجلی کا آئینہ

پہنچی ہے کس مقام پہ دیوانگی مری

کنج قفس میں یاد نشیمن ہے اور میں

دیکھے تو آ کے کوئی ذرا بیکسی مری

میرے چراغ عشق سے دنیا ہے فیض یاب

میرے ہی کام نہ آ سکی روشنی مری

مسرور ہوں کہ حشر میں اٹھا سر نیاز

مقبول‌ بارگاہ رہی بندگی مری

میں ہوں فناؔ قمر کی تجلی سے فیض یاب

دنیا میں ہے چراغ ادب شاعری مری