ہے دلیل کل نفس سب فنا ہو جائیں گے

ہے دلیل کل نفس سب فنا ہو جائیں گے

ہم بھی اک دن راہیٔ ملک بقا ہو جائیں گے

قبر ہی تک ساتھ دیں گے دوستان بے ریا

داب کر مٹی میں سب پیارے جدا ہو جائیں گے

ہاتھ خالی جائیں گے دنیا سے دولت چھوڑ کر

مال کے مالک عزیز و اقربا ہو جائیں گے

پہلوان کیا کر رہے ہیں جسم کے اعضا پہ ناز

قبر میں کیڑے مکوڑے کی غذا ہو جائیں گے

جیتے جی کچھ کام کر لو آخرت کا غافلو

مرتے دم بیکار سارے دست و پا ہو جائیں گے

ہو گیے اولاد سے ماں باپ گر مر کر جدا

خلد میں اے دوستو سب ایک جا ہو جائیں گے

دیکھ کر مرقد میں طاہرؔ سرور دیں کا جمال

عاشق جاں باز قدموں پر فدا ہو جائیں گے