نگاہ یار مد مستی میں بھی ہشیار کیسی ہے

نگاہ یار مد مستی میں بھی ہشیار کیسی ہے

مرا دل چھین لینے کے لئے تیار کیسی ہے

ادا سے پھیر کر خنجر گلے پر یوں لگے کہنے

شہید ناز بتلاؤ کہ اس میں دھار کیسی ہے

جگر میں چھا گئی پہلو میں کس کے دل میں جا تڑپی

غضب کی چلبلی چنچل نگاہ یار کیسی ہے

ابھی نکلا ہے دم ٹھہرو کسی سے مل تو لینے دو

ابھی سے لے کے چلنے کی یہ مارا مار کیسی ہے

وہ ہم کو ذبح کرتے ہیں ہم ہی سے پوچھتے ہیں یوں

ذرا صاحب بتا دینا مری تلوار کیسی ہے

قضا بھی صدقے ہوتی ہے نگاہ تیر قاتل کے

شہادتؔ سر کٹانے کے لئے تیار کیسی ہے