آرزو پر اشعار

ساغر کی آرزو ہے نہ پیمانہ چاہیے

بس اک نگاہ مرشد میخانہ چاہیے

آرزو یہ ہے تمہارا آنچل آنکھوں سے لگے

کچھ سمجھتے ہو کہ ہم روتے ہوئے آتے ہیں کیوں

آرزو حسرت تمنا مدعا کوئی نہیں

جب سے تم ہو میرے دل میں دوسرا کوئی نہیں

آرزو ہے کہ ترا دھیان رہے تا دم مرگ

شکل تیری نظر آئے مجھے جب آئے اجل

ہر آنکھ کو ہے تری تمنا

ہر دل میں تری ہی آرزو ہے

آرزو ہے وفاؔ یہی اپنی

ان کے قدموں میں دم نکل جائے

یہ فریب تسکیں ہے ترک آرزو معلوم

ترک آرزو میکشؔ یہ بھی آرزو ہی ہے

کہیں رخ بدل نہ لے اب مری آرزو کا دھارا

وہ بدل رہے ہیں نظریں مری زندگی بدل کر

اسے بھی ناوک جاناں تو اپنے ساتھ لیتا جا

کہ میری آرزو دل سے نکلنے کو ترستی ہے

پہنچ جاتی ہے کسی کے گوش دل تک

ہماری آرزو اتنی کہاں ہے

رہی یہ آرزو آخر کے دم تک

نہ پہنچا سر مرا تیرے قدم تک

حسرت و یاس و آرزو شوق کا اقتدا کریں

کشتۂ غم کی لاش پر دھوم سے ہو نماز عشق

مدتوں سے آرزو یہ دل میں ہے

ایک دن تو گھر ہمارے آئیے

اس وقت تک سلگتی رہی اس کی آرزو

جب تک دھوئیں سے سارا بدن بھر نہیں گیا

دونوں جانب اگر آرزو وصل کی کوئی طوفاں اٹھائے تو میں کیا کروں

عشق انہیں گدگدائے تو وہ کیا کریں حسن مجھ کو بلائے تو میں کیا کروں

آرزو ہم ناخدا کی کیوں کریں

اپنی کشتی کا تو افسر اور ہے

یہ آرزو ہے کہ وہ نامہ بر سے لے کاغذ

بلا سے پھاڑ کے پھر ہاتھ میں نہ لے کاغذ

محبت میں سراپا آرزو در آرزو میں ہوں

تمنا دل مرا ہے اور مرے دل کی تمنا تو

میرا دم بھی سماع میں نکلے

اب یہی ہے اک آرزو خواجہ

کلیم بات بڑھاتے نہ گفتگو کرتے

لب خاموش سے اظہار آرزو کرتے

ملیں بھی وہ تو کیونکر آرزو بر آئے گی دل کی

نہ ہوگا خود خیال ان کو نہ ہوگی التجا مجھ سے

تصور میں وہ آئیں گے تو پوری آرزو ہوگی

وہ میرے پاس ہوں گے اور ان سے گفتگو ہوگی

اب تو صادقؔ ہے یہ آرزو

عشق ہی میری منزل بنے

نہ نکلے جب کوئی ارماں نہ کوئی آرزو نکلی

تو اپنی حسرتوں کا خون ہونا اس کو کہتے ہیں

ہماری آرزو دل کی تمہاری جنبش لب پر

تمنا اب بر آتی ہے اگر کچھ لب کشا تم ہو

بیان درد آگیں ہے کہے گا جا کے کیا قاصد

حدیث آرزو میری پریشاں داستاں میری

مجھے ہر قدم تیری جستجو مجھے ہر نفس تیری آرزو

مجھے اپنا غم ہے نہ غم جہاں تیری شان جل جلالہ

سکھائی ناز نے قاتل کو بے دردی کی خو برسوں

رہی بیتاب سینہ میں ہماری آرزو برسوں

یہی آرزو دل میں دھرتا اچھے

خدا سوں مناجات کرتا اچھے

لگتے ہی ٹھیس ٹوٹ گیا ساز آرزو

ملتے ہی آنکھ شیشۂ دل چور چور تھا

کچھ آرزو سے کام نہیں عشقؔ کو صبا

منظور اس کو ہے وہی جو ہو رضائے گل

مری آرزو کے چراغ پر کوئی تبصرہ بھی کرے تو کیا

کبھی جل اٹھا سر شام سے کبھی بجھ گیا سر شام سے

یہ آرزو ہے کہ معراج زندگی ہو جائے

غلام کی در آقا پہ حاضری ہو جائے

پوچھتے ہیں وہ آرزو کوثرؔ

دل میں ارماں ایک ہو تو کہوں

ساحل کی آرزو نہیں تعلیم مصطفیٰ

یہ ناؤ تو روزانہ ہی منجدھار سے ہوئی

کوثرؔ وصل شاہ حسیناں کی آرزو

مجھ کو نہیں جہاں میں ہوس مال و جاہ کی

وہ مل کے دست حنائی سے دل لہو کرتے

ہم آرزو کو حسیں خون آرزو کرتے

دیجئے ان کو کنار آرزو پر اختیار

جب وہ ہوں آغوش میں بے دست و پا ہو جائیے

وہ تجلی جس نے دشت آرزو چمکا دیا

کچھ تو میرے دل میں ہے اور کچھ کف موسیٰ میں ہے

سب کچھ خدا نے مجھ کو دیا عرشؔ بے طلب

دختر کی آرزو نہ تمنا پسر کی ہے

آرزو کے دل پہ آئیں گی نہ کیا کیا آفتیں

در پیے انکار ہے ناآشنائی آپ کی

مجھے عیش و غم میں غرض نہیں اگر آرزو ہے تو ہے یہی

کہ امنگ بن کے چھپا رہے کوئی دل کے پردۂ راز میں

آرزو لازم ہے وجہ آرزو ہو یا نہ ہو

التفات اس کافر خود بیں کی خو ہو یا نہ ہو

امیدیں تجھ سے تھیں وابستہ لاکھوں آرزو لیکن

بہت ہو کر تری درگاہ سے بے اعتبار آئی

بہار آنے کی آرزو کیا بہار خود ہے نظر کا دھوکا

ابھی چمن جنت نظر ہے ابھی چمن کا پتا نہیں ہے

تیرے غم کی حسرت و آرزو ہے زبان عشق میں زندگی

جنہیں مل گیا ہے یہ مدعا وہ مقام زیست بھی پا گئے

ازل سے ابھی تک تو یکساں ہے عالم

یہی آرزو تھی یہی آرزو ہے