وہی بزم ہے وہی مے کدہ وہی مے کدہ کا مقام ہے

وہی بزم ہے وہی مے کدہ وہی مے کدہ کا مقام ہے

مگر ایک ان کے نہ ہونے سے نہ وہ صبح ہے نہ وہ شام ہے

ہوا جب سے پیر مغاں نہاں ہوا بزم کا کچھ عجب سماں

نہ وہ مے کدہ نہ وہ جام ہے نہ وہ مے کدہ کا نظام ہے

دیا گلستاں کے لیے لہو سہے ہر طرح کے ستم مگر

نہ چمن میں ہے میرا ذکر اب نہ وفا شعاروں میں نام ہے

کبھی ایک سجدہ سے ہوتی تھی تری جلوہ گاہ کی راہ طے

مگر اب کہاں وہ خلوص دل نہ وہ مقتدی نہ امام ہے

ہے ہر ایک ذرہ سے وہ عیاں گو وہ لاکھ پردوں میں ہے نہاں

جو نظر نہ آئے نگاہ کو تو عقیدت اپنی ہی خام ہے

جو کہیں بھی ان سے تو کیا کہیں وہ سنیں گے دل کا فسانہ کب

وہ جب اس طرح سے ہیں بد گماں نہ سلام ہے نہ پیام ہے

جسے پیتے پیتے نگاہ سے تھے حجاب جتنے وہ اٹھ گئے

یہ بتا دے شیخ حرم مجھے وہ شراب کیسے حرام ہے

یہی رشک روز ازل سے ہے یہی فکر حور و ملک کو ہے

نہ فرشتہ جا سکے جس جگہ وہ بشر کا ادنیٰ مقام ہے

فقط ایک اخترؔ بینوا ترے نقش پا پہ ہے چل رہا

یہ وہ دور ورنہ ہے ساقیا کہ ہر ایک رند امام ہے