افسوس عشق ظالم تن من جلا رہا ہے

افسوس عشق ظالم تن من جلا رہا ہے

کیا ہجر اس صنم کا دل کو ستا رہا ہے

کس سے کہوں میں اپنی سنتا نہیں ہے کوئی

جو کچھ کہ دل میں اپنے یارو سما رہا ہے

گھائل ہوا ہوں اس کے گھونگٹ کے پٹ الٹ پر

وہ شوخ ناز اپنے کیا کیا دکھا رہا ہے

اپنی تو یہ صدا ہے اس در پہ رب ارنی

آواز لن ترانی کس کو سنا رہا ہے

فرمان نحن اقرب ہر جا ہو معکم

کیا خوب خوش ادا سے پیارا بتا رہا ہے

مرتے ہیں ہم تو یارو حسن ازل پہ اس کے

کیا جانے کس خطا سے مکھڑا چھپا رہا ہے

میرانؔ شاہ سر کے بل تو اب چل پیران کلیئر

فیض عام گنج مخفی صابر لٹا رہا ہے