afsos ishq-e-zalim tan-man jala raha hai

afsos 'ishq-e-zālim tan-man jalā rahā hai

kyā hijr us sanam kā dil ko satā rahā hai

kis se kahūñ maiñ apnī suntā nahīñ hai koī

jo kuchh ki dil meñ apne yaaro samā rahā hai

ghā.il huā huuñ us ke ghūñgaT ke paT ulaT par

vo shoḳh naaz apne kyā kyā dikhā rahā hai

apnī to ye sadā hai us dar pe rabbe-arenī

āvāz-e-lan-tarānī kis ko sunā rahā hai

farmān-e-nahnu-aqrab har jā huva-ma.akum

kyā ḳhuub ḳhush-adā se pyārā batā rahā hai

marte haiñ ham to yaaro husn-e-azal pe us ke

kyā jaane kis ḳhatā se mukhḌā chhupā rahā hai

‘mīrān’ shaah sar ke bal tū ab chal pīrān-e-kaliyar

faiz-e-'ām ganj-e-maḳhfī sābir luTā rahā hai

afsos 'ishq-e-zalim tan-man jala raha hai

kya hijr us sanam ka dil ko sata raha hai

kis se kahun main apni sunta nahin hai koi

jo kuchh ki dil mein apne yaro sama raha hai

ghail hua hun us ke ghungaT ke paT ulaT par

wo shoKH naz apne kya kya dikha raha hai

apni to ye sada hai us dar pe rabbe-areni

aawaz-e-lan-tarani kis ko suna raha hai

farman-e-nahnu-aqrab har ja huwa-makum

kya KHub KHush-ada se pyara bata raha hai

marte hain hum to yaro husn-e-azal pe us ke

kya jaane kis KHata se mukhDa chhupa raha hai

‘miran’ shah sar ke bal tu ab chal piran-e-kaliyar

faiz-e-'am ganj-e-maKHfi sabir luTa raha hai