madih-e-Khairul-mursalin

samt-e-kāshī se chalā jānib-e-mathurā bādal

barq ke kāñdhe pe laatī hai sabā gañgā-jal

ghar meñ ashnān kareñ sarv-qadāñ gokul

jā ke jamunā pe nahānā bhī hai ik tuul amal

ḳhabar uḌtī huī aa.ī hai mahā-ban meñ abhī

ki chale aate haiñ thīrth ko havā par bādal

tah-o-bālā ka.e dete haiñ havā ke jhoñke

beḌe bhādoñ ke nikalte haiñ bhare gañgā-jal

kabhī Duubī kabhī uchhlī mah-e-nau kī kashtī

bahr-e-aḳhzar meñ talātum se paḌī hai halchal

shab-e-daijūr añdhere meñ hai bādal ke nihāñ

lailā mahmil meñ hai Daale hue muñh par āñchal

ātish-e-gul kā dhuāñ bām-e-falak par pahuñchā

jam gayā manzil-e-ḳhurshīd kī chhat meñ kājal

jis taraf se ga.ī bijlī phir idhar aa na sakī

qila-e-charḳh meñ hai bhūl-bhulayyāñ bādal

ā.īna āb-e-tamavvuj se bahā jaatā hai

kahiye tasvīr se girnā na kahīñ dekh sambhal

aaj ye nashv-o-numā kā hai sitāra chamkā

shāḳh meñ kāhkashāñ ke nikal aa.ī kopal

ḳhizr farmāte haiñ sumbul se tirī umr-e-darāz

phuul se kahte haiñ phaltā rahe gulzār-e-amal

dekhte dekhte baḌh jaatī hai gulshan kī bahār

dīda-e-nargis-e-shahlā ko na samjho ahval

lahreñ letā hai jo bijlī ke muqābil sabza

charḳh par bādalā phailā hai zamīñ par maḳhmal

ham-zabāñ vasf-e-chaman meñ hue sab ahl-e-chaman

tūtiyoñ kī hai jo tazmīn to bulbul kī ġhazal

jugnū phirte haiñ jo gulbun meñ to aatī hai nazar

mus.haf gul ke havāshī pe tilā.ī jadval

shāḳh par phuul haiñ jumbish meñ zamīñ par sumbul

sab havā khāte haiñ gulshan meñ savār-o-paidal

āh-e-qumrī meñ mazā aur maze meñ tāsīr

sarv meñ dekhiye phuul aane lage phuul meñ phal

ḳhanda-hā-e-gul qālīñ se huā shor-e-nushūr

kyā ajab hai jo pareshān hai ḳhvāb-e-maḳhmal

shāḳh-e-shamshād pe qumrī se kaho chheḌe malār

nau-nihālān-e-gulistāñ ko sunā.e ye ġhazal

turfa-e-gardish meñ giraftār ajab pher meñ hai

surma hai niiñd mirī dīda-e-bedār kharal

samt-e-kāshī se gayā jānib-e-mathurā bādal

tairtā hai kabhī gañgā kabhī jamunā bādal

samt-e-kāshī se gayā jānib-e-mathurā bādal

birj meñ aaj sir-kishan hai kaalā bādal

shāhid-e-gul kā liye saath hai Dolā bādal

barq kahtī hai mubārak tujhe sahrā bādal

ḳhuub chhāyā hai sar-e-gokul-o-mathurā bādal

rañg meñ aaj kanhayyā ke hai Duubā bādal

sat.h-e-aflāk nazar aatī hai gañgā-jamanī

ruup bijlī kā sunahrā hai rūpahlā bādal

charḳh par bijlī kī chal phir se nazar aatā hai

sabza chamkā.e hilātā huā barchhā bādal

bijlī do-chār qadam chal ke palaT jaaye na kyuuñ

vo añdherā hai ki phirtā hai bhaTaktā bādal

jab talak birj meñ jamunā hai ye khulne kā nahīñ

hai qasam khaa.e uThā.e hue gañgā bādal

chashma-e-mahr hai aks-e-zar-e-gul se dariyā

partav-e-barq se hai sone kā bajrā bādal

mirī āñkhoñ meñ samātā nahīñ ye josh-o-ḳharosh

kisī bedard ko dikhlā ye karishma bādal

tapish-e-dil kā uḌāyā huā naqsha bijlī

chashm-e-pur-āb kā dhoyā huā ḳhāka bādal

dil-e-betāb kī adnā sī chamak hai bijlī

chashm-e-pur-āb kā hai ek karishma bādal

apnī kam-zarfiyoñ se laakh falak par chaḌh jaaye

merī āñkhoñ kā hai utrā huā sadqa bādal

kuchh hañsī-khel nahīñ joshish-e-girya kā zabt

ye mirā dil hai ye merā hai kalejā bādal

rāja-indr hai parī-ḳhāna-e-may kā paanī

naġhma mai kā sir-kishan kanhayyā bādal

dekhtā gar kahīñ 'mohsin' kī fuġhān-o-zārī

na garajtā kabhī aisā na barastā bādal

phir chalā ḳhāma-qasīda kī taraf ba.ad ġhazal

ki hai chakkar meñ suḳhan-go kā dimāġh-e-muḳhtal

mai-e-gul-rañg hai kyā sham.a-e-shab-e-fikr kā phuul

chalte chalte jo qalam haath se jaatā hai nikal

hai suḳhan-go ko na inshā kī na imlā kī ḳhabar

ho ga.ī nazm kī inshā kī ḳhabar sab mohmal

dil meñ kuchh aur hai par muñh se nikaltā hai kuchh aur

lafz be-ma.anī haiñ aur ma.anī haiñ sab be-aTkal

kitnā be-qaid huā kitnā ye āvāra phirā

koī mandir na bachā us se na koī asthal

kabhī gañgā pe bhaTaktā hai kabhī jamunā par

ghāghrā par kabhī guzrā kabhī sū-e-chammal

chhīñTe dene se na mahfūz rahī qulzum-o-nīl

na bachā ḳhaak uḌāne se koī dasht-o-jabal

haañ ye sach hai ki tabī.at ne uḌāyā jo ġhubār

huī ā.īna-e-mazmūñ kī do-chandāñ saiqal

ik zarā dekhiye kaifiyat-e-me.arāj-e-suḳhan

haath meñ jām-e-zuhal shīsha-e-mah zer-e-baġhal

girte paḌte kahāñ mastāna kahāñ rakhā paañv

ki tasavvur bhī jahāñ jā na sake farq ke bal

ya.anī us nuur ke maidān meñ pahuñchā ki jahāñ

ḳhirman-e-barq-e-tajallī kā laqab hai bādal

tār-bārān-e-musalsal hai malā.ek kā darūd

ba-har tasbīh ḳhudā-vand-e-jahāñ izz-o-jal

kahīñ tuubā kahīñ kausar kahīñ firdaus-e-barīñ

kahīñ bahtī huī nahr-e-luban va nahr-e-asal

kahīñ ''jibrīl hukūmat pe kahīñ isrāfīl

kahīñ rizvāñ kā kahīñ sāqī-e-kausar kā amal

kanz-e-maḳhfī ke kisī samt nihāñ tah-ḳhāne

ik taraf maz.har-e-qudrat ke ayaañ shīsh-mahal

āshiq-e-jalva talabgār kahīñ chashm-e-qabūl

nāz-e-mahbūb ke parde meñ kahīñ husn-e-amal

gul-e-be-rañgī-e-mutlaq se lahakte gulzār

be-niyāzī ke riyāhīñ se mahakte jañgal

bāġh-e-tanzīh meñ sarsabz nihāl-e-tashbīh

ambiyā jis kī haiñ shāḳheñ urfā haiñ kopal

gul-e-ḳhush-rañg rasūl-e-madanī-arbī

zeb-e-dāmān-e-abad turra-e-dastār-e-azal

na koī us kā mushābah hai na ham-sar na nazīr

na koī us kā mumāsil na muqābil na badal

auj-e-rif.at kā qamar naḳhl-e-do-ālam kā samar

bahr-e-vahdat kā guhar chashma-kasrat kā kañval

mohr-e-tauhīd kī zau auj-e-sharaf kā mah-e-nau

sham.a-e-ījād kī lo bazm-e-risālat kā kañval

marja.a-e-rūh-e-amīñ zeb-dah arsh-e-barīñ

hāmī-e-dīn-e-matīñ nāsiḳh-e-adiyān-o-milal

haf-iqlīm vilāyat meñ shah-e-ālī-jāh

chaar atrāf-e-hidāyat meñ nabīl-e-mursal

jī meñ aatā hai likhūñ matl.a-e-barjasta agar

vajd meñ aa ke qalam haath se jaaye na uchhal

muntaḳhab nusḳha-e-vahdat kā ye thā roz-e-azal

ki na ahmad kā hai saanī na ahad kā avval

daur-e-ḳhurshīd kī bhī hashr meñ ho jā.egī sub.h

tā-abad daur-e-mohammad kā hai roz-e-avval

shab-e-asrā meñ tajallī se rū-e-anvar kī

paḌ ga.ī gardan zafraf meñ sunahrī haikal

sajda-e-shukr meñ hai nāsiya-e-arsh-e-barīñ

ḳhaak se paa.e muqaddas kī lagā kar sandal

afzaliyat pe tirī mushtamil āsār-o-kutub

avāliyat pe tirī muttafiq adyān-o-milal

lutf se tere huī shaukat-e-īmāñ mohkam

qahr se saltanat-e-kufar huī mustāsal

jis taraf haath baḌheñ kufar ke chhaT jaa.eñ qadam

jis jagah paañv rakheñ sajda kareñ lāt-o-hubal

ho sakā hai kahīñ mahbūb-e-ḳhudā ġhair-e-ḳhudā

ik zarā dekh samajh kar mirī chashm-e-ahval

raf.a hone kā na thā vahdat-o-kasrat kā ḳhilāf

miim ahmad ne kiyā aa ke ye qissa faisal

nazar aa.e mujhe ahmad meñ agar daal duī

roz-e-mahshar huuñ ilāhī merī āñḳheñ ahval

phir usī tarz kī mushtāq hai mavvājī tab.a

ki hai is bahr meñ ik qāfiya achchhā bādal

kyā jhukā ka.abe kī jānib ko hai qibla bādal

sajde kartā hai sū-e-taiba-o-batahā bādal

chhoḌ kar but-kada-e-hind va sanam-ḳhāna-e-braj

aaj ka.aba meñ bichhā.e hai musallā bādal

sabza-e-charḳh ko añdhiyārī lagā kar laayā

shahsavār-e-arabī ke liye kaalā bādal

bahr-e-imkā۔n meñ rasūl-e-arabī durr-e-yatīm

rahmat-e-ḳhās ḳhudāvand-ta.āla bādal

qibla-e-ahl-e-nazar ka.aba-e-abrū-e-huzūr

mū-e-sar qible ko ghere hue kaalā bādal

rashk se sho.ala-e-ruḳhsār ke rotī hai barq

barq ke muñh pe rakhe hue pallā bādal

duur pahuñchī lab-e-jāñ-baḳhsh nabī kī shohrat

sun zarā kahte haiñ kyā hazrat-e-īsā bādal

chashm-e-insāf se dekh aap ke dandān-e-sharīf

dur-e-yaktā hai terā garche yagāna bādal

thā bañdhā taar farishtoñ kā dar-e-aqdas par

shab-e-me.arāj meñ thā arsh-e-muallā bādal

āmad-o-raft meñ thā ham-qadam-e-barq burrāq

murġh-zār-e-chaman-e-ālam-e-bālā bādal

haf-iqlīm meñ is diiñ kā bajā hai Dañkā

thā tirī aam risālat kā garajtā bādal

āstāne kā tire dahr meñ vo rutba hai

ki jo niklā to jhukā.e hue kāñdhā bādal

to vo faiyyaz hai dar par tire saa.il kī tarah

falak-e-pīr ko laayā diye kāñdhā bādal

teġh maidān-e-shujā.at meñ chamaktī bijlī

haath gulzār-e-saḳhāvat meñ barastā bādal

'mohsin' ab dījiye gulzār-e-munājāt kī sair

ki ijābat kā chalā aatā hai gahrā bādal

sab se aalā tirī sarkār hai sab se afzal

mere īmān-e-mufassal kā yahī hai mujmal

hai tamannā ki rahe na.at se terī ḳhālī

na mirā sher na qit.a na qasīda na ġhazal

dīn-o-duniyā meñ kisī kā na sahārā ho mujhe

sirf terā hī bharosa tirī quvvat tarā bil

ho mirā resha-e-ummīd vo naḳhl-e-sarsabz

jis kī har shāḳh meñ ho phuul har ik phuul meñ phal

aarzū hai ki tirā dhyān rahe tā-dam-e-marg

shakl terī nazar aa.e mujhe jab aa.e ajal

ruuh se merī kahīñ pyaar se yoñ izrā.īl

ki mirī jaan madīne ko jo chaltī hai to chal

dam-e-murdan ye ishāra ho shafā.at kā tirī

fikr-e-fardā to na kar dekh liyā jā.egā kal

yaad ā.īna-e-ruḳhsār se hairat ho mujhe

gosha-e-qabr nazar aa.e mujhe shīsh-mahal

mezbāñ ban ke nakīrain kaheñ ghar hai tirā

na uThānā koī taklīf na honā bekal

ruḳh-e-anvar kā tire dhyān rahe ba.ad-e-fanā

mere hamrāh chale rāh-e-adam meñ mash.al

hazf huuñ mere gunāhān-e-saqīl aur ḳhafīf

aa.eñ mīzāñ meñ jab af.āl-e-sahīh-o-muattil

merī shāmat se ho ārāsta gesū-e-siyāh

āriz-e-shāhid-e-mahshar ho agar husn-e-amal

saf-e-mehshar meñ tire saath ho terā maddāh

haath meñ ho yahī mastāna qasīda ye ġhazal

kaheñ jibrīl ishāre se ki haañ! bismillāh

samt-e-kāshī se chalā jānib-e-mathurā bādal

samt-e-kashi se chala jaanib-e-mathura baadal

barq ke kandhe pe lati hai saba ganga-jal

ghar mein ashnan karen sarw-qadan gokul

ja ke jamuna pe nahana bhi hai ek tul amal

KHabar uDti hui aai hai maha-ban mein abhi

ki chale aate hain thirth ko hawa par baadal

tah-o-baala kae dete hain hawa ke jhonke

beDe bhadon ke nikalte hain bhare ganga-jal

kabhī Dubi kabhī uchhli mah-e-nau ki kashti

bahr-e-aKHzar mein talatum se paDi hai halchal

shab-e-daijur andhere mein hai baadal ke nihan

laila mahmil mein hai Dale hue munh par aanchal

aatish-e-gul ka dhuan baam-e-falak par pahuncha

jam gaya manzil-e-KHurshid ki chhat mein kajal

jis taraf se gai bijli phir idhar aa na saki

qila-e-charKH mein hai bhul-bhulayyan baadal

aaina aab-e-tamawwuj se baha jata hai

kahiye taswir se girna na kahin dekh sambhal

aaj ye nashw-o-numa ka hai sitara chamka

shaKH mein kahkashan ke nikal aai kopal

KHizr farmate hain sumbul se teri umr-e-daraaz

phul se kahte hain phalta rahe gulzar-e-amal

dekhte dekhte baDh jati hai gulshan ki bahaar

dida-e-nargis-e-shahla ko na samjho ahwal

lahren leta hai jo bijli ke muqabil sabza

charKH par baadala phaila hai zamin par maKHmal

ham-zaban wasf-e-chaman mein hue sab ahl-e-chaman

tutiyon ki hai jo tazmin to bulbul ki ghazal

jugnu phirte hain jo gulbun mein to aati hai nazar

mushaf gul ke hawashi pe tilai jadwal

shaKH par phul hain jumbish mein zamin par sumbul

sab hawa khate hain gulshan mein sawar-o-paidal

aah-e-qumri mein maza aur maze mein tasir

sarw mein dekhiye phul aane lage phul mein phal

KHanda-ha-e-gul qalin se hua shor-e-nushur

kya ajab hai jo pareshan hai KHwab-e-maKHmal

shaKH-e-shamshad pe qumri se kaho chheDe malar

nau-nihaalan-e-gulistan ko sunae ye ghazal

turfa-e-gardish mein giraftar ajab pher mein hai

surma hai nind meri dida-e-bedar kharal

samt-e-kashi se gaya jaanib-e-mathura baadal

tairta hai kabhī ganga kabhī jamuna baadal

samt-e-kashi se gaya jaanib-e-mathura baadal

birj mein aaj sir-kishan hai kala baadal

shahid-e-gul ka liye sath hai Dola baadal

barq kahti hai mubarak tujhe sahra baadal

KHub chhaya hai sar-e-gokul-o-mathura baadal

rang mein aaj kanhayya ke hai Duba baadal

sath-e-aflak nazar aati hai ganga-jamani

rup bijli ka sunahra hai rupahla baadal

charKH par bijli ki chal phir se nazar aata hai

sabza chamkae hilata hua barchha baadal

bijli do-chaar qadam chal ke palaT jaye na kyun

wo andhera hai ki phirta hai bhaTakta baadal

jab talak birj mein jamuna hai ye khulne ka nahin

hai qasam khae uThae hue ganga baadal

chashma-e-mahr hai aks-e-zar-e-gul se dariya

partaw-e-barq se hai sone ka bajra baadal

meri aankhon mein samata nahin ye josh-o-KHarosh

kisi bedard ko dikhla ye karishma baadal

tapish-e-dil ka uDaya hua naqsha bijli

chashm-e-pur-ab ka dhoya hua KHaka baadal

dil-e-betab ki adna si chamak hai bijli

chashm-e-pur-ab ka hai ek karishma baadal

apnī kam-zarfiyon se lakh falak par chaDh jaye

meri aankhon ka hai utra hua sadqa baadal

kuchh hansi-khel nahin joshish-e-girya ka zabt

ye mera dil hai ye mera hai kaleja baadal

raja-indr hai pari-KHana-e-may ka pani

naghma mai ka sir-kishan kanhayya baadal

dekhta gar kahin 'mohsin' ki fughan-o-zari

na garajta kabhī aisa na barasta baadal

phir chala KHama-qasida ki taraf baad ghazal

ki hai chakkar mein suKHan-go ka dimagh-e-muKHtal

mai-e-gul-rang hai kya shama-e-shab-e-fikr ka phul

chalte chalte jo qalam hath se jata hai nikal

hai suKHan-go ko na insha ki na imla ki KHabar

ho gai nazm ki insha ki KHabar sab mohmal

dil mein kuchh aur hai par munh se nikalta hai kuchh aur

lafz be-mani hain aur mani hain sab be-aTkal

kitna be-qaid hua kitna ye aawara phira

koi mandir na bacha us se na koi asthal

kabhī ganga pe bhaTakta hai kabhī jamuna par

ghaghra par kabhī guzra kabhī su-e-chammal

chhinTe dene se na mahfuz rahi qulzum-o-nil

na bacha KHak uDane se koi dasht-o-jabal

han ye sach hai ki tabiat ne uDaya jo ghubar

hui aaina-e-mazmun ki do-chandan saiqal

ek zara dekhiye kaifiyat-e-mearaj-e-suKHan

hath mein jam-e-zuhal shisha-e-mah zer-e-baghal

girte paDte kahan mastana kahan rakha panw

ki tasawwur bhi jahan ja na sake farq ke bal

yani us nur ke maidan mein pahuncha ki jahan

KHirman-e-barq-e-tajalli ka laqab hai baadal

tar-baran-e-musalsal hai malaek ka darud

ba-har tasbih KHuda-wand-e-jahan izz-o-jal

kahin tuba kahin kausar kahin firdaus-e-barin

kahin bahti hui nahr-e-luban wa nahr-e-asal

kahin jibril hukumat pe kahin israfil

kahin rizwan ka kahin saqi-e-kausar ka amal

kanz-e-maKHfi ke kisi samt nihan tah-KHane

ek taraf mazhar-e-qudrat ke ayan shish-mahal

aashiq-e-jalwa talabgar kahin chashm-e-qabul

naz-e-mahbub ke parde mein kahin husn-e-amal

gul-e-be-rangi-e-mutlaq se lahakte gulzar

be-niyazi ke riyahin se mahakte jangal

bagh-e-tanzih mein sarsabz nihaal-e-tashbih

ambiya jis ki hain shaKHen urfa hain kopal

gul-e-KHush-rang rasul-e-madani-arbi

zeb-e-daman-e-abad turra-e-dastar-e-azal

na koi us ka mushabah hai na ham-sar na nazir

na koi us ka mumasil na muqabil na badal

auj-e-rifat ka qamar naKHl-e-do-alam ka samar

bahr-e-wahdat ka guhar chashma-kasrat ka kanwal

mohr-e-tauhid ki zau auj-e-sharaf ka mah-e-nau

shama-e-ijad ki lo bazm-e-risalat ka kanwal

marja-e-ruh-e-amin zeb-dah arsh-e-barin

hami-e-din-e-matin nasiKH-e-adiyan-o-milal

haf-iqlim wilayat mein shah-e-ali-jah

chaar atraf-e-hidayat mein nabil-e-mursal

ji mein aata hai likhun matla-e-barjasta agar

wajd mein aa ke qalam hath se jaye na uchhal

muntaKHab nusKHa-e-wahdat ka ye tha roz-e-azal

ki na ahmad ka hai sani na ahad ka awwal

daur-e-KHurshid ki bhi hashr mein ho jaegi subh

ta-abad daur-e-mohammad ka hai roz-e-awwal

shab-e-asra mein tajalli se ru-e-anwar ki

paD gai gardan zafraf mein sunahri haikal

sajda-e-shukr mein hai nasiya-e-arsh-e-barin

KHak se pae muqaddas ki laga kar sandal

afzaliyat pe teri mushtamil aasar-o-kutub

awaliyat pe teri muttafiq adyan-o-milal

lutf se tere hui shaukat-e-iman mohkam

qahr se saltanat-e-kufar hui mustasal

jis taraf hath baDhen kufar ke chhaT jaen qadam

jis jagah panw rakhen sajda karen lat-o-hubal

ho saka hai kahin mahbub-e-KHuda ghair-e-KHuda

ek zara dekh samajh kar meri chashm-e-ahwal

rafa hone ka na tha wahdat-o-kasrat ka KHilaf

mim ahmad ne kiya aa ke ye qissa faisal

nazar aae mujhe ahmad mein agar dal dui

roz-e-mahshar hun ilahi meri aanKHen ahwal

phir usi tarz ki mushtaq hai mawwaji taba

ki hai is bahr mein ek qafiya achchha baadal

kya jhuka kabe ki jaanib ko hai qibla baadal

sajde karta hai su-e-taiba-o-bataha baadal

chhoD kar but-kada-e-hind wa sanam-KHana-e-braj

aaj kaba mein bichhae hai musalla baadal

sabza-e-charKH ko andhiyari laga kar laya

shahsawar-e-arabi ke liye kala baadal

bahr-e-imka۔n mein rasul-e-arabi durr-e-yatim

rahmat-e-KHas KHudawand-taala baadal

qibla-e-ahl-e-nazar kaba-e-abru-e-huzur

mu-e-sar qible ko ghere hue kala baadal

rashk se shoala-e-ruKHsar ke roti hai barq

barq ke munh pe rakhe hue palla baadal

dur pahunchi lab-e-jaan-baKHsh nabi ki shohrat

sun zara kahte hain kya hazrat-e-isa baadal

chashm-e-insaf se dekh aap ke dandan-e-sharif

dur-e-yakta hai tera garche yagana baadal

tha bandha tar farishton ka dar-e-aqdas par

shab-e-mearaj mein tha arsh-e-mualla baadal

aamad-o-raft mein tha ham-qadam-e-barq burraq

murgh-zar-e-chaman-e-alam-e-baala baadal

haf-iqlim mein is din ka baja hai Danka

tha teri aam risalat ka garajta baadal

aastane ka tere dahr mein wo rutba hai

ki jo nikla to jhukae hue kandha baadal

to wo faiyyaz hai dar par tere sail ki tarah

falak-e-pir ko laya diye kandha baadal

tegh maidan-e-shujaat mein chamakti bijli

hath gulzar-e-saKHawat mein barasta baadal

'mohsin' ab dijiye gulzar-e-munajat ki sair

ki ijabat ka chala aata hai gahra baadal

sab se aala teri sarkar hai sab se afzal

mere iman-e-mufassal ka yahī hai mujmal

hai tamannā ki rahe nat se teri KHali

na mera sher na qita na qasida na ghazal

din-o-duniya mein kisi ka na sahaara ho mujhe

sirf tera hi bharosa teri quwwat tara bil

ho mera resha-e-ummid wo naKHl-e-sarsabz

jis ki har shaKH mein ho phul har ek phul mein phal

aarzu hai ki tera dhyan rahe ta-dam-e-marg

shakl teri nazar aae mujhe jab aae ajal

ruh se meri kahin pyar se yon izrail

ki meri jaan madine ko jo chalti hai to chal

dam-e-murdan ye ishaara ho shafaat ka teri

fikr-e-farda to na kar dekh liya jaega kal

yaad aaina-e-ruKHsar se hairat ho mujhe

gosha-e-qabr nazar aae mujhe shish-mahal

mezban ban ke nakirain kahen ghar hai tera

na uThana koi taklif na hona bekal

ruKH-e-anwar ka tere dhyan rahe baad-e-fana

mere hamrah chale rah-e-adam mein mashal

hazf hun mere gunahan-e-saqil aur KHafif

aaen mizan mein jab afal-e-sahih-o-muattil

meri shamat se ho aarasta gesu-e-siyah

aariz-e-shahid-e-mahshar ho agar husn-e-amal

saf-e-mehshar mein tere sath ho tera maddah

hath mein ho yahī mastana qasida ye ghazal

kahen jibril ishaare se ki han! bismillah

samt-e-kashi se chala jaanib-e-mathura baadal