آہ پر اشعار

میں اپنی آہ کے صدقے کہ میری آہ میں بھی

تری نگاہ کے انداز پائے جاتے ہیں

درد دل کتنا پسند آیا اسے

میں نے جب کی آہ اس نے واہ کی

نالہ فریاد آہ اور زاری

آپ سے ہو سکا سو کر دیکھا

نہ لگا لے گئے جہاں دل کو

آہ لے جائیے کہاں دل کو

وہ کہ اک مدت تلک جس کو بھلا کہتا رہا

آہ اب کس منہ سے ذکر اس کی برائی کا کروں

لایا تمہارے پاس ہوں یا پیر الغیاث

کر آہ کے قلم سے میں تحریر الغیاث

تیرے فراق میں ہر وقت آہ کرتا ہوں

تیرے لیے جوانی تباہ کرتا ہوں

فلک خود پیر ہے گردش ستائے آپ ہی اس کو

اسی سے آہ کو شکوہ ہے اپنی نارسائی کا

سینکڑوں مر مر گئے ہیں عشق کے ہاتھوں سے آہ

میں ہی کیا پتھر سے اپنا سر پٹک کر رہ گیا

ادھر سے بھی ہے سوا کچھ ادھر کی مجبوری

کہ ہم نے آہ تو کی ان سے آہ بھی نہ ہوئی

آہ اے یار کیا کروں تجھ بن

نالۂ زار کیا کروں تجھ بن

نہ پوچھو بے نیازی آہ طرز امتحاں دیکھو

ملائی خاک میں ہنس ہنس کے میری آبرو برسوں

ایک دن مدتوں میں آئے ہو

آہ تس پر بھی منہ چھپائے ہو

ہر دم آتی ہے گرچہ آہ پر آہ

پر کوئی کارگر نہیں آتی

آپ کو ہم نے کھو دیا ہے بیاںؔ

آہ کس کا سراغ رکھتے ہیں

دو قدم پر رہ گئی ہے منزل مقصود آہ

چھوڑ کر تنہا نہ جاؤ ہمرہاں بہر خدا

ہوس جو دل میں گزرے ہے کہوں کیا آہ میں تم کو

یہی آتا ہے جی میں بن کے بامہن آج تو یارو

کیا کروں آہ میں اثرؔ کا علاج

اس گھڑی اس کا جی ہی جاتا ہے

کاری لگی جگر پہ کٹاری نگاہ کی

بے خود ہوا زمیں پر گرا دل سے آہ کی

آہ ملتے ہی پھر جدائی کی

واہ کیا خوب آشنائی کی

آہ اس پردہ نشیں کی جستجو میں جو گئے

کچھ پتہ پایا نہ اس کا خود ہی جا کر کھو گئے

کیوں میں فراق یار میں آہ و فغاں کروں

کوثرؔ دل حزیں جرس کارواں نہیں

کریں آہ و فغاں پھوڑیں پھپھولے اس طرح دل کے

ارادہ ہے کہ روئیں عید کے دن بھی گلے مل کے

پیہم جو آہ آہ کیے جا رہا ہوں میں

دولت ہے غم زکوٰۃ دئیے جا رہا ہوں میں

سیلاب چشم اشک میں ہونٹوں پہ آہ ہے

اے درد دل بہت مری حالت تباہ ہے

آہ دنیا سرائے فانی ہے

کس قدر مختصر کہانی ہے

کچھ درد کی شدت ہے کچھ پاس محبت ہے

ہم آہ تو کرتے ہیں فریاد نہیں کرتے

کس طرح دکھاؤں آہ تجھ کو

میں اپنی یہ خراب حالی