pahlu-e-ashiq maqam-e-aish-e-jaanana hua

pahlū-e-'āshiq maqām-e-'aish-e-jānāna huā

dil meñ jo do din rahā vo sāhab-e-ḳhāna huā

vo parī-paikar yagāna ban ke begāna huā

dushmanī kī ham se jab ġhairoñ se yārāna huā

rashk aa.e ham ko kyā-kyā gardish-e-taqdīr par

chashm-e-sāqī par bilā gardāñ jo paimāna huā

dil ko tum apnā banā kar kuchh bahut ḳhush ho buto

vo hamārā hī yagāna thā jo begāna huā

jaam saaqī ne diyā ham ko to ḳhālī hī diyā

gardish-e-taqdīr ban kar duur paimāna huā

aa hī rahtā hai shab-e-ġham ik na ik armān-e-vasl

dil hamārā ārzuoñ kā jalva-ḳhāna huā

tūl-e-hijr-e-yār ne barsoñ meñ badlā apnā rañg

rafta-rafta ġham ummīd-e-vasl-e-jānāna huā

rāt-din mehmān rahtā hai kisī but kā ḳhayāl

pahle kā'ba thā mirā dil ab sanam-ḳhāna huā

sham'-e-rū bazm-e-sulaimāñ kī dikhāte haiñ bahār

jis jagah do chaar mil baiThe parī-ḳhāna huā

shaiḳh kī sūrat banā.e baiThe haiñ sab bāda-ḳhvār

mai-kade meñ inqalāb-e-vaz'-e-rindāna huā

dekh liiñ 'ehsān' ham ne 'ishq kī nairañgiyāñ

phir vo kāfir hai kahīñ gesū kahīñ shāna huā

pahlu-e-'ashiq maqam-e-'aish-e-jaanana hua

dil mein jo do din raha wo sahab-e-KHana hua

wo pari-paikar yagana ban ke begana hua

dushmani ki hum se jab ghairon se yarana hua

rashk aae hum ko kya-kya gardish-e-taqdir par

chashm-e-saqi par bila gardan jo paimana hua

dil ko tum apna bana kar kuchh bahut KHush ho buto

wo hamara hi yagana tha jo begana hua

jam saqi ne diya hum ko to KHali hi diya

gardish-e-taqdir ban kar dur paimana hua

aa hi rahta hai shab-e-gham ek na ek arman-e-wasl

dil hamara aarzuon ka jalwa-KHana hua

tul-e-hijr-e-yar ne barson mein badla apna rang

rafta-rafta gham ummid-e-wasl-e-jaanana hua

raat-din mehman rahta hai kisi but ka KHayal

pahle ka'ba tha mera dil ab sanam-KHana hua

sham'-e-ru bazm-e-sulaiman ki dikhate hain bahaar

jis jagah do chaar mil baiThe pari-KHana hua

shaiKH ki surat banae baiThe hain sab baada-KHwar

mai-kade mein inqalab-e-waz'-e-rindana hua

dekh lin 'ehsan' hum ne 'ishq ki nairangiyan

phir wo kafir hai kahin gesu kahin shana hua