phir hausla dua ko hua hai wafa kare

phir hausla duā ko huā hai vafā kare

zālim jafā se baaz na aa.e ḳhudā kare

maftūn-e-sad-nīgāh tamannā hai dil mirā

us ko kahāñ talak koī sarf-e-vafā kare

sad-gūna hadd-e-hasr se afzūñ hai shauq-e-dil

kyā umr-e-ḳhizr ko koī sarf-e-duā kare

phir dīda-o-jigar meñ haiñ bāham ye chashmakeñ

tīr-e-nigāh-e-yār kahāñ dekheñ kyā kare

phir teġh-e-nāz DhūñDtī hai sīna-o-jigar

tīr-e-nigah ko dhun hai ki phir dil meñ jā kare

phir jeb ko havas hai ki ho yuuñ vo taar taar

mamnūn baḳhiya-gar na tabī.at huā kare

phir garm aah shoa.la-fishāñ hai dil hazīñ

phir gar ye chāhtā hai ki tūfāñ bapā kare

un zoroñ josh par hai phir ashk-e-ravāñ kī sel

phir hai junūñ kā hukm ki mahshar bapā kare

phir ishq chāhtā hai tire āstāna par

bā-minnat-o-niyāz mujhe jab.ha-sā kare

mere ġhubār ko hai ḳhayāl-e-urūj phir

tā zer-e-bār-e-mannat dosh-e-sabā kare

phir imtihān-e-jazba-e-dil ko chalī hai yaas

tā mehrbāñ ho vo but-e-kāfir ḳhudā kare

phir mere sar pe khel rahī hai ajal mirī

shamshīr-e-nāz tan se mirā sar judā kare

kyā phir hai mai-kashī kā tahayya janāb-e-'mast'

zāhid se kah do abr kī is dam duā kare

phir hausla dua ko hua hai wafa kare

zalim jafa se baz na aae KHuda kare

maftun-e-sad-nigah tamanna hai dil mera

us ko kahan talak koi sarf-e-wafa kare

sad-guna hadd-e-hasr se afzun hai shauq-e-dil

kya umr-e-KHizr ko koi sarf-e-dua kare

phir dida-o-jigar mein hain baham ye chashmaken

tir-e-nigah-e-yar kahan dekhen kya kare

phir tegh-e-naz DhunDti hai sina-o-jigar

tir-e-nigah ko dhun hai ki phir dil mein ja kare

phir jeb ko hawas hai ki ho yun wo tar tar

mamnun baKHiya-gar na tabiat hua kare

phir garm aah shoala-fishan hai dil hazin

phir gar ye chahta hai ki tufan bapa kare

un zoron josh par hai phir ashk-e-rawan ki sel

phir hai junun ka hukm ki mahshar bapa kare

phir ishq chahta hai tere aastana par

ba-minnat-o-niyaz mujhe jabha-sa kare

mere ghubar ko hai KHayal-e-uruj phir

ta zer-e-bar-e-mannat dosh-e-saba kare

phir imtihan-e-jazba-e-dil ko chali hai yas

ta mehrban ho wo but-e-kafir KHuda kare

phir mere sar pe khel rahi hai ajal meri

shamshir-e-naz tan se mera sar juda kare

kya phir hai mai-kashi ka tahayya janab-e-'mast'

zahid se kah do abr ki is dam dua kare