mai-kade mein mujh tak aakHir daur-e-jam aa hi gaya

mai-kade meñ mujh tak ākHir daur-e-jām aa hī gayā

merā rañg-e-be-niyāzī mere kaam aa hī gayā

jazba-e-be-iḳhtiyār-e-shauq tujh ko kyā kahūñ

mere lab par be-irāda un kā naam aa hī gayā

āstān-e-yār ke qurbāñ mirā daur-e-hayāt

jis jagah khonā hai mujh ko vo maqām aa hī gayā

ik mire aate hī mai-ḳhāne meñ saaqī kah uThā

be-niyāz-e-sāġhar-o-mīna-o-jām aa hī gayā

ḳhushk dāmānī kā shikva kar rahī thī zindagī

ek taarā TuuT kar bālā-e-bām aa hī gayā

ik tasavvur kī badaulat is tarah hoñ mutma.in

jaise mere paas vo mahshar-ḳhirām aa hī gayā

ab to ai 'bahzād' ḳhud un ke payām aane lagī

merā jazb-e-shauq ākHir mere kaam aa hī gayā

mai-kade mein mujh tak aakHir daur-e-jam aa hi gaya

mera rang-e-be-niyazi mere kaam aa hi gaya

jazba-e-be-iKHtiyar-e-shauq tujh ko kya kahun

mere lab par be-irada un ka nam aa hi gaya

aastan-e-yar ke qurban mera daur-e-hayat

jis jagah khona hai mujh ko wo maqam aa hi gaya

ek mere aate hi mai-KHane mein saqi kah uTha

be-niyaz-e-saghar-o-mina-o-jam aa hi gaya

KHushk damani ka shikwa kar rahi thi zindagi

ek tara TuT kar baala-e-baam aa hi gaya

ek tasawwur ki badaulat is tarah hon mutmain

jaise mere pas wo mahshar-KHiram aa hi gaya

ab to ai 'bahzad' KHud un ke payam aane lagi

mera jazb-e-shauq aakHir mere kaam aa hi gaya