gul-badaman gul sarapa gul hi gul hai KHu-e-dost

gul-badāmāñ gul sarāpā gul hī gul hai ḳhū-e-dost

balki vo gul hī nahīñ jis meñ na ho kHushbū-e-dost

guftugū hotī hai merī aaj bhī chāroñ pahar

jab bhī chāhā sāmne aatā rahā hai rū-e-dost

dil kā saudā ho gayā thā chaar jab āñkheñ huiiñ

chain ab miltā nahīñ jab tak na jā.ūñ sū-e-dost

bādshāhat bhī mile to hai mire kis kaam kī

maiñ to banñā chāhtā huuñ bas gadā-e-kū-e-dost

lazzatoñ meñ ek lazzat kā nahīñ koī javāb

jo mazā miltā hai mujh ko baiTh kar pahlū-e-dost

jab bhī āñkheñ band kiiñ the sāmne haft āsmāñ

maiñ ne dekhā hai bahut nazdīk se jādū-e-dost

kaun guzrā hai yahāñ se kyuuñ huā hai ’itr-bez

ġhaur se dekho karishma-sāz hai gesū-e-dost

ham ne maanā ham bahut kamzor haiñ nādār haiñ

bhuul jaate ho bhalā tum kis tarah bāzū-e-dost

'ālam' gargānvī ne she'r achchhe haiñ kahe

kaash un alfāz kī tashbīh ho lūlū-e-dost

gul-badaman gul sarapa gul hi gul hai KHu-e-dost

balki wo gul hi nahin jis mein na ho kHushbu-e-dost

guftugu hoti hai meri aaj bhi chaaron pahar

jab bhi chaha samne aata raha hai ru-e-dost

dil ka sauda ho gaya tha chaar jab aankhen huin

chain ab milta nahin jab tak na jaun su-e-dost

baadshahat bhi mile to hai mere kis kaam ki

main to banna chahta hun bas gada-e-ku-e-dost

lazzaton mein ek lazzat ka nahin koi jawab

jo maza milta hai mujh ko baiTh kar pahlu-e-dost

jab bhi aankhen band kin the samne haft aasman

main ne dekha hai bahut nazdik se jadu-e-dost

kaun guzra hai yahan se kyun hua hai ’itr-bez

ghaur se dekho karishma-saz hai gesu-e-dost

hum ne mana hum bahut kamzor hain nadar hain

bhul jate ho bhala tum kis tarah bazu-e-dost

'alam' garganwi ne she'r achchhe hain kahe

kash un alfaz ki tashbih ho lulu-e-dost