سوز غم سے تن ز بس ہم دوش خاکستر رہا

سوز غم سے تن ز بس ہم دوش خاکستر رہا

اس سے جو چمکا شرر روپوش خاکستر رہا

صورت ہستی میں پھر دیکھیں گے شکل رفتگاں

اب تلک آئینہ ہم آغوش خاکستر رہا

وادیٔ وحشت اثر میں یاں غبار رفتگاں

گرد باد آسا سدا بر دوش خاکستر رہا

جل کے پروانہ ہوا جو راکھ کا اک ڈھیر رات

اشک‌‌‌ چشم شمع تا سر گوش خاکستر رہا

کسوت خاکستری ہے فاختہ کے بر میں آہ

گلستان دہر میں کیا جوش خاکستر رہا

دامن شب ہے سیہ ملتا ہے منہ سے خاک چرخ

کس کو اس ماتم کدہ میں ہوش خاکستر رہا

کیوں نہ ہو افتادگاں کی قدر یاں اب اے نصیرؔ

نقش پائے رفتگاں سر پوش خاکستر رہا