har aankh mein tera jalwa hai har dil mein surur-o-masti hai

har aañkh meñ terā jalva hai har dil meñ surūr-o-mastī hai

bas qābil-e-sajda mere liye sarkār tumhārī hastī hai

har naaz pe miTte jaate haiñ andāz pe miTte jaate haiñ

e sham' tire parvānoñ kī ye jaan bhī kitnī sastī hai

jis samt guzarte jaate haiñ har gaam pe kā'be bante haiñ

saaqī ke nirāle mastoñ meñ kuchh aisī nirālī mastī hai

mai-ḳhāne ke dīvār-o-dar par mastī mañDlātī phirtī hai

har mast kī āñkhoñ se dekho kausar kī sharāb barastī hai

us 'ishq ke kūche meñ ham ne har gaam pe likkhā dekhā hai

jo 'ishq ke bande haiñ un kī duniyā se nirālī bastī hai

jis jā pe ‘amīr’-e-sābarī kī jhuktī hai jabīn-e-shauq vahīñ

sab 'arsh ke rahne vāloñ kī sajdoñ ko jabīñ tarastī hai

har aankh mein tera jalwa hai har dil mein surur-o-masti hai

bas qabil-e-sajda mere liye sarkar tumhaari hasti hai

har naz pe miTte jate hain andaz pe miTte jate hain

e sham' tere parwanon ki ye jaan bhi kitni sasti hai

jis samt guzarte jate hain har gam pe ka'be bante hain

saqi ke nirale maston mein kuchh aisi nirali masti hai

mai-KHane ke diwar-o-dar par masti manDlati phirti hai

har mast ki aankhon se dekho kausar ki sharab barasti hai

us 'ishq ke kuche mein hum ne har gam pe likkha dekha hai

jo 'ishq ke bande hain un ki duniya se nirali basti hai

jis ja pe ‘amir’-e-sabari ki jhukti hai jabin-e-shauq wahin

sab 'arsh ke rahne walon ki sajdon ko jabin tarasti hai