kaliyan ye surKH surKH nahin lala-zar mein

kaliyāñ ye surḳh surḳh nahīñ lāla-zār meñ

mehñdī lagī hai dast-e-urūs-e-bahār meñ

lūTeñge ab ke saal maze ham bahār meñ

mushk-o-namak bhareñge dil-e-dāġh-dār meñ

jo aabla hai apne dil dāġh-dār meñ

gumbad kisī shahīd kā hai lāla-zār meñ

is vāste ki ek hī ho merī us kī shakl

muñh dekhtā huuñ ā.īna-e-rū-e-yār meñ

ā.īna dekh dekh ke us ne banā.ī zulf

pahuñchī kumak halab se barābar tatār meñ

aane de aap meñ mujhe ik dam to be-ḳhudī

baiThe haiñ kab se log mere intizār meñ

gard-e-nigāh-e-yār se dil hai mirā tabāh

rahrav ko sūjhtī nahīñ manzil ġhubār meñ

jo shoḳh-tab.a haiñ vo jhapakte nahīñ kahīñ

bijlī kaTār khīñch ke aa.ī hazār meñ

kis parde meñ kudūrat-e-dil kā ishāra hai

likhā hai ḳhat bhī us ne to ḳhatt-e-ġhubār meñ

jaalī ke parde meñ ruḳh-e-gulgūñ nahīñ tirā

haiñ jāliyāñ naqāb-e-urūs-e-bahār meñ

kis gul kā sū-e-gor-e-garībāñ guzar huā

phūle nahīñ samāte haiñ murde mazār meñ

kyā be-sabāt-e-bāġh thā gul ho ga.e havā

jab tak karūñ maiñ chaak garebāñ bahār meñ

duniyā hī meñ jo baat nahīñ pūchhtā koī

roz-e-hisāb ā.eñge ham kis shumār meñ

jī loT hai taḌapne par ab tak magar 'amīr'

ab jaan hī nahīñ hai dil-e-be-qarār meñ

kaliyan ye surKH surKH nahin lala-zar mein

mehndi lagi hai dast-e-urus-e-bahaar mein

luTenge ab ke sal maze hum bahaar mein

mushk-o-namak bharenge dil-e-dagh-dar mein

jo aabla hai apne dil dagh-dar mein

gumbad kisi shahid ka hai lala-zar mein

is waste ki ek hi ho meri us ki shakl

munh dekhta hun aaina-e-ru-e-yar mein

aaina dekh dekh ke us ne banai zulf

pahunchi kumak halab se barabar tatar mein

aane de aap mein mujhe ek dam to be-KHudi

baiThe hain kab se log mere intizar mein

gard-e-nigah-e-yar se dil hai mera tabah

rahraw ko sujhti nahin manzil ghubar mein

jo shoKH-taba hain wo jhapakte nahin kahin

bijli kaTar khinch ke aai hazar mein

kis parde mein kudurat-e-dil ka ishaara hai

likha hai KHat bhi us ne to KHatt-e-ghubar mein

jali ke parde mein ruKH-e-gulgun nahin tera

hain jaliyan naqab-e-urus-e-bahaar mein

kis gul ka su-e-gor-e-gariban guzar hua

phule nahin samate hain murde mazar mein

kya be-sabaat-e-bagh tha gul ho gae hawa

jab tak karun main chaak gareban bahaar mein

duniya hi mein jo baat nahin puchhta koi

roz-e-hisab aaenge hum kis shumar mein

ji loT hai taDapne par ab tak magar 'amir'

ab jaan hi nahin hai dil-e-be-qarar mein