main mahw-e-tauf paiham tha liye paimana ka’be mein

maiñ mahv-e-tauf paiham thā liye paimāna kā’be meñ

ma.āz-allāh vo merī laġhzish-e-mastāna kā’be meñ

jamā'at kī namāzeñ aur dar-o-dīvār ke bose

milā rakhī hai rasm-e-masjid-o-but-kHāna kā’be meñ

bajā.e dast-e-sāqī chūmte haiñ sañg-e-asvad ko

nazar aatā hai jalva be-rukH-e-jānā kā’be meñ

qasam hai nargis-e-sāqī ke mastāna ishāroñ kī

bahut yaad aa.ī mujh ko gardish-e-paimāna kā’be meñ

agar sajda na karatā maiñ to kyā karatā kahāñ jaatā

ḳhudā ban-ban ke aayā jalva-e-jānāna kā’be meñ

hudūd-e-shar.a meñ bhī dekhnā pābandī-e-ulfat

tavāf-e-sham.a hī karatā rahā parvāna kā’be meñ

'nushūr' āḳhir vahāñ bhī rishta-e-sāqī nahīñ TuuTā

tajallī ban ke aayā shāhid-e-mai-kHāna kā’be meñ

main mahw-e-tauf paiham tha liye paimana ka’be mein

maaz-allah wo meri laghzish-e-mastana ka’be mein

jama'at ki namazen aur dar-o-diwar ke bose

mila rakhi hai rasm-e-masjid-o-but-kHana ka’be mein

bajae dast-e-saqi chumte hain sang-e-aswad ko

nazar aata hai jalwa be-rukH-e-jaana ka’be mein

qasam hai nargis-e-saqi ke mastana ishaaron ki

bahut yaad aai mujh ko gardish-e-paimana ka’be mein

agar sajda na karata main to kya karata kahan jata

KHuda ban-ban ke aaya jalwa-e-jaanana ka’be mein

hudud-e-shara mein bhi dekhna pabandi-e-ulfat

tawaf-e-shama hi karata raha parwana ka’be mein

'nushur' aaKHir wahan bhi rishta-e-saqi nahin TuTa

tajalli ban ke aaya shahid-e-mai-kHana ka’be mein