sanson ki mala par simrun nis-din pi ka nam

sāñsoñ kī maalā par simrūñ nis-din pī kā naam

apne man kī maiñ jānūñ aur pī ke man kī raam

prem ke rañg meñ aise Duubī ban gayā ek hī ruup

shyām kī maalā japte-japte aap banī maiñ shyām

añg-añg meñ rachī huī hai yuuñ mohan kī priit

ek aañkh vrindāvan merī duujī gokul dhaam

prem pyāla jab se piyā hai jī kā hai ye haal

añgāroñ par niiñd aa jaaye kāñToñ par ārām

pītam kā kuchh dosh nahīñ hai vo to haiñ nirdos

apne aap se bāteñ kar ke ho ga.ī maiñ badnām

jaag uThtī hai jab hirday meñ prem kī sachchī jot

is nagrī meñ ho jaatā hai pītam kā vishrām

jī ne jab se jaan liyā hai dukh bhī hai un kī den

paap samajh rakkhā hai maiñ ne lenā sukh kā naam

jīvan kā siñgār hai pirītam maañg kā hai sindūr

pirītam kī nazroñ se gir kar jiinā hai kis kaam

darshan jal kī pyāsī āñkheñ ro ro kar ga.iiñ suukh

añdhiyāroñ meñ Duub ga.e birhan ke sub.h-o-shām

sanson ki mala par simrun nis-din pi ka nam

apne man ki main jaanun aur pi ke man ki ram

prem ke rang mein aise Dubi ban gaya ek hi rup

shyam ki mala japte-japte aap bani main shyam

ang-ang mein rachi hui hai yun mohan ki prit

ek aankh wrindawan meri duji gokul dham

prem pyala jab se piya hai ji ka hai ye haal

angaron par nind aa jaye kanTon par aaram

pitam ka kuchh dosh nahin hai wo to hain nirdos

apne aap se baaten kar ke ho gai main badnam

jag uThti hai jab hirday mein prem ki sachchi jot

is nagri mein ho jata hai pitam ka wishram

ji ne jab se jaan liya hai dukh bhi hai un ki den

pap samajh rakkha hai main ne lena sukh ka nam

jiwan ka singar hai piritam mang ka hai sindur

piritam ki nazron se gir kar jina hai kis kaam

darshan jal ki pyasi aankhen ro ro kar gain sukh

andhiyaron mein Dub gae birhan ke subh-o-sham