tamul kar rag-e-jaan mein nihan allah hi allah hai

tāmul kar rag-e-jāñ meñ nihāñ allāh hī allāh hai

nazar shān-e-basar par kar 'ayāñ allāh hī allāh hai

uThā de parda-e-ism-e-ta’ayyun ko dar-e-dil se

'ayāñ hogā tujhe jumla-jahāñ allāh hī allāh hai

ḳhulāsa hai yahī sair-e-nuzūlī aur ’urūjī kā

zamīñ allāh hī allāh āsmāñ allāh hī allāh hai

banā kar kufr ko ā.īna sūrat dekh īmāñ kī

sanam kī shakl meñ jalva-kunāñ allāh hī allāh hai

pukārā kHāna-e-tan par jo maiñ ne kaun hai ghar meñ

sadā aa.ī dar-e-dil se ki haañ allāh hī allāh hai

'vatan' hai ainamā kā ā.īna pesh-e-nazar jab se

jahāñ meñ dekhtā huuñ maiñ jahāñ allāh hī allāh hai

tamul kar rag-e-jaan mein nihan allah hi allah hai

nazar shan-e-basar par kar 'ayan allah hi allah hai

uTha de parda-e-ism-e-ta’ayyun ko dar-e-dil se

'ayan hoga tujhe jumla-jahan allah hi allah hai

KHulasa hai yahi sair-e-nuzuli aur ’uruji ka

zamin allah hi allah aasman allah hi allah hai

bana kar kufr ko aaina surat dekh iman ki

sanam ki shakl mein jalwa-kunan allah hi allah hai

pukara kHana-e-tan par jo main ne kaun hai ghar mein

sada aai dar-e-dil se ki han allah hi allah hai

'watan' hai ainama ka aaina pesh-e-nazar jab se

jahan mein dekhta hun main jahan allah hi allah hai