Aashiq Shayari

āshiq hazāroñ sūrat-e-parvāna gir paḌe

ulTī naqāb ruḳh se jo mahfil meñ yaar ne

aashiq hazaron surat-e-parwana gir paDe

ulTi naqab ruKH se jo mahfil mein yar ne

qatl kuchh āshiq hue maqtal meñ us ke haath se

kuchh phire māyūs aur shauq-e-shahādat le chale

qatl kuchh aashiq hue maqtal mein us ke hath se

kuchh phire mayus aur shauq-e-shahadat le chale

dil kā aalam āshiqī meñ kyā kahūñ kyā ho gayā

rañj sahte sahte patthar kā kaleja ho gayā

dil ka aalam aashiqi mein kya kahun kya ho gaya

ranj sahte sahte patthar ka kaleja ho gaya

āshiqoñ ko phir qazā aa.ī qayāmat ho ga.ī

phir samand-e-nāz ko us turk ne jaulāñ kiyā

aashiqon ko phir qaza aai qayamat ho gai

phir samand-e-naz ko us turk ne jaulan kiya

'aughat' jahāñ meñ ab dil-o-dīñ pūchhtā hai kaun

āshiq kā in butoñ meñ koī qadar-dāñ nahīñ

'aughat' jahan mein ab dil-o-din puchhta hai kaun

aashiq ka in buton mein koi qadar-dan nahin

na tum ne qadr kuchh āshiq kī jaanī

bahut ro.o.ge ab tum yaad kar ke

na tum ne qadr kuchh aashiq ki jaani

bahut rooge ab tum yaad kar ke

dard-e-dil avval to vo āshiq kā sunte hī nahīñ

aur jo sunte haiñ to sunte haiñ fasāne kī tarah

dard-e-dil awwal to wo aashiq ka sunte hi nahin

aur jo sunte hain to sunte hain fasane ki tarah

itnā to jānte haiñ ki āshiq fanā huā

aur us se aage baḌh ke ḳhudā jaane kyā huā

itna to jaante hain ki aashiq fana hua

aur us se aage baDh ke KHuda jaane kya hua

muñh phere hue to mujh se jaatā hai kahāñ

mar jā.egā āshiq tirā aare aare

munh phere hue to mujh se jata hai kahan

mar jaega aashiq tera aare aare

mohabbat jab huī ġhālib nahīñ chhuptī chhupāne se

fuġhān-o-āh-o-nāla hai tire āshiq kā naqqārā

mohabbat jab hui ghaalib nahin chhupti chhupane se

fughan-o-ah-o-nala hai tere aashiq ka naqqara

gir paḌe ġhash khā ke āshiq aur murde jī uThe

do-qadam jab vo chale ye hashr barpā ho gayā

gir paDe ghash kha ke aashiq aur murde ji uThe

do-qadam jab wo chale ye hashr barpa ho gaya

ham to āshiq haiñ tere sūraj pe juuñ sūraj-mukhī

ho jidhar tū bas udhar hī muñh hamārā phir gayā

hum to aashiq hain tere suraj pe jun suraj-mukhi

ho jidhar tu bas udhar hi munh hamara phir gaya

tum ko kahte haiñ ki āshiq kī fuġhāñ sunte ho

ye to kahne hī kī bāteñ haiñ kahāñ sunte ho

tum ko kahte hain ki aashiq ki fughan sunte ho

ye to kahne hi ki baaten hain kahan sunte ho

usī ko kāmyāb-e-dīd kahte haiñ nazar vaale

vo āshiq jo halāk-e-hasrat-e-dīdār ho jaa.e

usi ko kaamyab-e-did kahte hain nazar wale

wo aashiq jo halak-e-hasrat-e-didar ho jae

dīn-o-maz.hab se tire āshiq ko ab kyā kaam hai

vo samajhtā hī nahīñ kyā kufr kyā islām hai

din-o-mazhab se tere aashiq ko ab kya kaam hai

wo samajhta hi nahin kya kufr kya islam hai

lafz-e-ulfat kī mukammal sharh ik terā vajūd

āshiqī meñ toḌ Dālīñ zāhirī saarī quyūd

lafz-e-ulfat ki mukammal sharh ek tera wajud

aashiqi mein toD Dalin zahiri sari quyud

āshiq na ho to husn kā ghar be-charāġh hai

lailā ko qais sham.a ko parvāna chāhiye

aashiq na ho to husn ka ghar be-charagh hai

laila ko qais shama ko parwana chahiye

kahā us ne ki 'akbar' kis ke āshiq ho kahā maiñ ne

tumhārī pyārī aadat kā tumhārī bholī sūrat kā

kaha us ne ki 'akbar' kis ke aashiq ho kaha main ne

tumhaari pyari aadat ka tumhaari bholi surat ka

ḳhabar apnī nahīñ rakhte ḳhabar ġhairoñ kī kyā rakheñ

ki āshiq mā-sivā-e-yār se be-zār baiThe haiñ

KHabar apni nahin rakhte KHabar ghairon ki kya rakhen

ki aashiq ma-siwa-e-yar se be-zar baiThe hain

dam toḌ rahā hai dekh zarā āshiq hai tirā kushta hai tirā

ai mohnī sūrat vaale hasīñ mahbūb ko yuuñ barbād na kar

dam toD raha hai dekh zara aashiq hai tera kushta hai tera

ai mohni surat wale hasin mahbub ko yun barbaad na kar

piirī ne bharā hai phir javānī kā ruup

āshiq hue ham ek but-e-kam-sin ke

piri ne bhara hai phir jawani ka rup

aashiq hue hum ek but-e-kam-sin ke

shāyad us ā.īna-rū ke hai bharā dil meñ ġhubār

ḳhaak āshiq par jo vo dāman jhaTak kar rah gayā

shayad us aaina-ru ke hai bhara dil mein ghubar

KHak aashiq par jo wo daman jhaTak kar rah gaya

daur aa.e aisā koī 'amīr' ab

ahbāb par hoñ ahbāb 'āshiq

daur aae aisa koi 'amir' ab

ahbab par hon ahbab 'ashiq

farq kyā 'āshiq-o-mā'shūq meñ bas itnā hai

koī dīvāna banā.e koī dīvāna bane

farq kya 'ashiq-o-ma'shuq mein bas itna hai

koi diwana banae koi diwana bane

ārzū-e-'āshiq dil-gīr aadhī rah ga.ī

yā'nī us ke vasl kī tadbīr aadhī rah ga.ī

aarzu-e-'ashiq dil-gir aadhi rah gai

ya'ni us ke wasl ki tadbir aadhi rah gai

hai āshiq ko apne sanam kī qasam

mujhe tere ḳhāk-e-qadam kī qasam

hai aashiq ko apne sanam ki qasam

mujhe tere KHak-e-qadam ki qasam

'āshiq huuñ maiñ to us sanam-e-b-’adīl kā

but-ḳhāna meñ jo rāh-numā thā ḳhalīl kā

'ashiq hun main to us sanam-e-b-’adil ka

but-KHana mein jo rah-numa tha KHalil ka

ma.ashūq-e-pā-bos meñ āshiq ne bichā.ī āñkheñ

farsh-e-gul par kabhī is shoḳh ko chalne na diyā

mashuq-e-pa-bos mein aashiq ne bichai aankhen

farsh-e-gul par kabhi is shoKH ko chalne na diya

ik lafz-e-mohabbat kā adnā ye fasānā hai

simTe to dil āshiq phaile to zamānā hai

ek lafz-e-mohabbat ka adna ye fasana hai

simTe to dil aashiq phaile to zamana hai

dil ke har goshe meñ tū ho āshiqī aisī to ho

maiñ terā ho kar rahūñ ab zindagī aisī to ho

dil ke har goshe mein tu ho aashiqi aisi to ho

main tera ho kar rahun ab zindagi aisi to ho

jo āshiq haiñ tere taḌapte nahīñ haiñ

kabhī āh-o-nāle vo karte nahīñ haiñ

jo aashiq hain tere taDapte nahin hain

kabhi aah-o-nale wo karte nahin hain

ishq meñ āshiq kī ye me.arāj hai

qatl ho qātil kā muñh dekhā kare

ishq mein aashiq ki ye mearaj hai

qatl ho qatil ka munh dekha kare

un kī hasrat ke sivā hai kaun is meñ dūsrā

dil kī ḳhalvat meñ bhī vo āshiq se sharmāte haiñ kyuuñ

un ki hasrat ke siwa hai kaun is mein dusra

dil ki KHalwat mein bhi wo aashiq se sharmate hain kyun

gar āshiq sādiq hai us kā mat ulfat tū ġhair se joḌ

zulm kare yā sitam kare tū ishq se us ke muñh mat moḌ

gar aashiq sadiq hai us ka mat ulfat tu ghair se joD

zulm kare ya sitam kare tu ishq se us ke munh mat moD

umīd-vār haiñ har samt āshiqoñ ke giroh

tirī nigāh ko allāh dil-navāz kare

umid-war hain har samt aashiqon ke giroh

teri nigah ko allah dil-nawaz kare

mujh ko mil jaaye to tadbīr-e-tasallī pūchhūñ

tū ne jis aañkh se āshiq kā taḌapnā dekhā

mujh ko mil jaye to tadbir-e-tasalli puchhun

tu ne jis aankh se aashiq ka taDapna dekha

tere āshiq tere shaidā kā ye haal

haa.e kaise tujh se dekhā jaa.e hai

tere aashiq tere shaida ka ye haal

hae kaise tujh se dekha jae hai

āshiqoñ ke hoñge rāh-e-yār meñ kyā kyā hujūm

shauq jin ko kārvāñ-dar-kārvāñ le jā.egā

aashiqon ke honge rah-e-yar mein kya kya hujum

shauq jin ko karwan-dar-karwan le jaega

dam-ba-dam yuuñ jo bad-gumānī hai

kuchh to āshiq kī tujh ko chaah paḌī

dam-ba-dam yun jo bad-gumani hai

kuchh to aashiq ki tujh ko chah paDi

ai sitamgar bevafā ye bevafā.ī kab talak

āshiqoñ kī tere kūche meñ duhā.ī kab talak

ai sitamgar bewafa ye bewafai kab talak

aashiqon ki tere kuche mein duhai kab talak