tap-e-gham se meri haalat hai abtar dekhte jao

tap-e-ġham se mirī hālat hai abtar dekhte jaao

zarā hāl-e-dil-e-be-tāb-o-muztar dekhte jaao

sabā ne kākul-e-mushkīñ ko chheḌā dosto lekin

ḳhafā hotā hai mujh par vo sitam-gar dekhte jaao

tumhāre rū-e-ātishnāk kī garmī se gulshan meñ

pasīne meñ hai Duubā har gul-e-tar dekhte jaao

kamar-basta tire aage ghaḌe haiñ ai mah-e-ḳhūbī

gulistāñ meñ gul-o-sarv-e-nanobar dekhte jaao

Dubo deñge jahāñ ko ek dam meñ apnī maujoñ se

hai tuġhyānī pe bahr-e-dīda-e-tar dekhte jaao

ġhalat-fahmī hai logoñ kī jo kahte haiñ hilāl us ko

tumhārā nāḳhun-e-pā hai falak par dekhte jaao

nahīñ ai hamdamo vāqif haiñ vo soz-e-mohabbat se

jigar jal kar huā yaañ misl-e-aḳhgar dekhte jaao

hazāroñ ḳhatre haiñ ai ham-safīro rāh-e-ulfat meñ

hai har-har gaam par yaañ teġh-o-ḳhanjar dekhte jaao

masīhā ho ke nafrat karte ho 'bīmār'-e-ulfat se

koī dam kā hai mehmāñ us ko dam-bhar dekhte jaao

tap-e-gham se meri haalat hai abtar dekhte jao

zara haal-e-dil-e-be-tab-o-muztar dekhte jao

saba ne kakul-e-mushkin ko chheDa dosto lekin

KHafa hota hai mujh par wo sitam-gar dekhte jao

tumhaare ru-e-atishnak ki garmi se gulshan mein

pasine mein hai Duba har gul-e-tar dekhte jao

kamar-basta tere aage ghaDe hain ai mah-e-KHubi

gulistan mein gul-o-sarw-e-nanobar dekhte jao

Dubo denge jahan ko ek dam mein apni maujon se

hai tughyani pe bahr-e-dida-e-tar dekhte jao

ghalat-fahmi hai logon ki jo kahte hain hilal us ko

tumhaara naKHun-e-pa hai falak par dekhte jao

nahin ai hamdamo waqif hain wo soz-e-mohabbat se

jigar jal kar hua yan misl-e-aKHgar dekhte jao

hazaron KHatre hain ai ham-safiro rah-e-ulfat mein

hai har-har gam par yan tegh-o-KHanjar dekhte jao

masiha ho ke nafrat karte ho 'bimar'-e-ulfat se

koi dam ka hai mehman us ko dam-bhar dekhte jao