zabt karna dil-e-hazin na kahin

zabt karnā dil-e-hazīñ na kahīñ

choT lag jā.egī kahīñ na kahīñ

jab taḌaptā hai dil maiñ Dartā huuñ

charḳh par jā paḌe zamīñ na kahīñ

hūreñ lipTī haiñ naza.a meñ mujh se

dekh paa.e vo nāznīñ na kahīñ

vasl kī shab nahīñ nahīñ kaisī

dekh sun le dil-e-hazīñ na kahīñ

dil meñ bāteñ bharī thiiñ kyā kyā kuchh

haaye kuchh vaqt-e-vāpsīñ na kahīñ

dil se shai le ke ab to nikle haiñ

pūchh legā koī kahīñ na kahīñ

na taḌap is qadar dil-e-be-tāb

saham jaa.e vo nāznīñ na kahīñ

mere iisā ke dil meñ chubh jaa.e

nigah vaqt-e-vāpsīñ na kahīñ

chain mardoñ ko qabr meñ bhī nahīñ

āsmān ho tah-e-zamīñ na kahīñ

aag ho jāygā vo shoḳh 'amīr'

khīñchnā āh-e-ātishīñ na kahīñ

zabt karna dil-e-hazin na kahin

choT lag jaegi kahin na kahin

jab taDapta hai dil main Darta hun

charKH par ja paDe zamin na kahin

huren lipTi hain naza mein mujh se

dekh pae wo naznin na kahin

wasl ki shab nahin nahin kaisi

dekh sun le dil-e-hazin na kahin

dil mein baaten bhari thin kya kya kuchh

haye kuchh waqt-e-wapsin na kahin

dil se shai le ke ab to nikle hain

puchh lega koi kahin na kahin

na taDap is qadar dil-e-be-tab

saham jae wo naznin na kahin

mere isa ke dil mein chubh jae

nigah waqt-e-wapsin na kahin

chain mardon ko qabr mein bhi nahin

aasman ho tah-e-zamin na kahin

aag ho jayga wo shoKH 'amir'

khinchna aah-e-atishin na kahin