dard kuchh aur baDha de dil-e-saudai ka

dard kuchh aur baḌhā de dil-e-saudā.ī kā

vāsta tujh ko sanam terī masīhā.ī kā

us kī āñkhoñ pe do-'ālam kī tamannā hai nisār

jis ne dekhā hai tamāshā tirī lailā.ī kā

kaun se dil se kisī aur kī jānib dekhūñ

naqsha āñkhoñ meñ khiñchā hai tirī zebā.ī kā

terī ulfat meñ banā phirtā hai tasvīr-e-junūñ

koī dekhe to ye 'ālam tire saudā.ī kā

hāl-e-dil apnā zamāne ko sunā duuñ lekin

Dar hai ai jān-e-tamannā tirī rusvā.ī kā

aap bichhḌe to mire dil se ḳhushī ruuTh ga.ī

luT gayā sabr-o-sukūñ aap ke shaidā.ī kā

ek sajda mujhe kar lene de ai mere sanam

mujh ko armān hai qadmoñ pe jabīñ-sā.ī kā

ek ehrām-e-mohabbat meñ do-'ālam haiñ 'fanā'

ye tamāshā hai sanam tere tamāshā.ī kā

dard kuchh aur baDha de dil-e-saudai ka

wasta tujh ko sanam teri masihai ka

us ki aankhon pe do-'alam ki tamanna hai nisar

jis ne dekha hai tamasha teri lailai ka

kaun se dil se kisi aur ki jaanib dekhun

naqsha aankhon mein khincha hai teri zebai ka

teri ulfat mein bana phirta hai taswir-e-junun

koi dekhe to ye 'alam tere saudai ka

haal-e-dil apna zamane ko suna dun lekin

Dar hai ai jaan-e-tamanna teri ruswai ka

aap bichhDe to mere dil se KHushi ruTh gai

luT gaya sabr-o-sukun aap ke shaidai ka

ek sajda mujhe kar lene de ai mere sanam

mujh ko arman hai qadmon pe jabin-sai ka

ek ehram-e-mohabbat mein do-'alam hain 'fana'

ye tamasha hai sanam tere tamashai ka