mil gaya unka dar bas aur kya chahiye

mil gayā unkā dar bas aur kyā chāhiye

mah-jabīñ naaz par bas aur kyā chāhiye

mahfil-e-'ishq meñ har taraf naam hai

yaar hai jalva-gar bas aur kyā chāhiye

duur karne ko merī pareshāniyāñ

aa.e vo mere ghar bas aur kyā chāhiye

bā-ḳhabar tujh se hai unkī chashm-e-karam

ai dil-e-be-ḳhabar bas aur kyā chāhiye

ye tumhārā karam hai rah-e-’ishq meñ

tum bane ham-safar bas aur kyā chāhiye

mil ga.ī hai mujhe mere dukh kī davā

saaz hai chāragar bas aur kyā chāhiye

unkī bekas-navāzī se merī ḳhatā

ho ga.ī dar-guzar bas aur kyā chāhiye

har ghaḌī har nafas shāmil-e-hāl hai

un kā faiz-e-nazar bas aur kyā chāhiye

aap se banda-parvar kā jān-e-karam

maiñ huuñ mohtāj-e-dar bas aur kyā chāhiye

bandagī ke liye jhuk gayā hai 'fanā'

un ke qadmoñ meñ sar bas aur kyā chāhiye

aa ga.ī sāmne jalva-gāh-e-sanam

tujh ko shauq-e-nazar bas aur kyā chāhiye

mil gaya unka dar bas aur kya chahiye

mah-jabin naz par bas aur kya chahiye

mahfil-e-'ishq mein har taraf nam hai

yar hai jalwa-gar bas aur kya chahiye

dur karne ko meri pareshaniyan

aae wo mere ghar bas aur kya chahiye

ba-KHabar tujh se hai unki chashm-e-karam

ai dil-e-be-KHabar bas aur kya chahiye

ye tumhaara karam hai rah-e-’ishq mein

tum bane ham-safar bas aur kya chahiye

mil gai hai mujhe mere dukh ki dawa

saz hai chaaragar bas aur kya chahiye

unki bekas-nawazi se meri KHata

ho gai dar-guzar bas aur kya chahiye

har ghaDi har nafas shamil-e-haal hai

un ka faiz-e-nazar bas aur kya chahiye

aap se banda-parwar ka jaan-e-karam

main hun mohtaj-e-dar bas aur kya chahiye

bandagi ke liye jhuk gaya hai 'fana'

un ke qadmon mein sar bas aur kya chahiye

aa gai samne jalwa-gah-e-sanam

tujh ko shauq-e-nazar bas aur kya chahiye