خفا اس سے کیوں تو مری جان ہے

اثرؔ تو کوئی دم کا مہمان ہے

ان بتوں کے لئے خدا نہ کرے

دین و دل یوں کوئی بھی کھوتا ہے

صرف غم ہم نے نوجوانی کی

واہ کیا خوب زندگانی کی

جنت ہے اس بغیر جہنم سے بھی زبوں

دوزخ بہشت ہے گی اگر یار ساتھ ہے

نہ لگا لے گئے جہاں دل کو

آہ لے جائیے کہاں دل کو

دن انتظار کا تو کٹا جس طرح کٹا

لیکن کسو طرح نہ کٹی رات رہ گئی

کیا کروں آہ میں اثرؔ کا علاج

اس گھڑی اس کا جی ہی جاتا ہے

اثرؔ ان سلوکوں پہ کیا لطف ہے

پھر اس بے مروت کے گھر جائیے

ہر دم آتی ہے گرچہ آہ پر آہ

پر کوئی کارگر نہیں آتی

نہیں ہے یہ قاتل تغافل کا وقت

خبر لے کہ باقی ابھی جان ہے

تو نگہ کی نہ کی خدا جانے

ہم تو ڈر سے کبھو نگاہ نہ کی

کہوں کیا خدا جانتا ہے صنم

محبت تری اپنا ایمان ہے

جان و دل سے بھی گزر جائیں

اگر ایسا ہی خفا کیجئے گا

بت کافر کی بے مروتیاں

یہ ہمیں سب خدا دکھاتا ہے

کیا کہوں تجھ سے اب کے میں تجھ کو

کس طرح دیکھتا ہوں خواب کے بیچ

کدھر کی خوشی کہاں کی شادی

جب دل سے ہوس ہی سب اڑا دی

کون رہتا ہے تیرے غم کے سوا

اس دل خانماں خراب کے بیچ

نالہ کرنا کہ آہ کرنا

دل میں اثرؔ اس کے راہ کرنا

گلوں کی طرح چاک‌ کا اے بہار

مہیا ہر اک یاں گریبان ہے

تیرے مکھڑے کو یوں تکے ہے دل

چاند کے جوں رہے چکور لگا

کہوں کیا خدا جانتا ہے صنم

محبت تری اپنا ایمان ہے

مشکل ہے تا کہ ہستی ہے جاوے خودی کا شرک

تار نفس نہیں ہے یہ زنار ساتھ ہے

جی اب کے بچا خدا خدا کر

پھر اور بتوں کی چاہ کرنا

کیا کہے وہ کہ سب ہویدا ہے

شان تیری تری کتاب کے بیچ

ابھی تو لگ نہ چلنا تھا اثرؔ اس گل بدن کے ساتھ

کوئی دن دیکھنا تھا زخم دل بے طرح آلا تھا

مانوس نہ تھا وہ بت کسو سے

ٹک رام کیا خدا خدا کر

نہ رہا انتظار بھی اے یاس

ہم امید وصال رکھتے تھے

دل و غم میں اور سینہ و داغ میں

رفاقت کا یاں عہد و پیمان ہے

نالے بلبل نے گو ہزار کیے

ایک بھی گل نے پر سنا ہی نہیں

غم ترا دل سے کوئی نکلے ہے

آہ ہر چند میں نکال رہا

کس طرح دکھاؤں آہ تجھ کو

میں اپنی یہ خراب حالی

روز و شب کس طرح بسر میں کروں

غم ترا اب تو جی ہی کھاتا ہے

دم بدم یوں جو بد گمانی ہے

کچھ تو عاشق کی تجھ کو چاہ پڑی

جوں گل تو ہنسے ہے کھل کھلا کر

شبنم کی طرح مجھے رلا کر

کر کے دل کو شکار آنکھوں میں

گھر کرے ہے تو یار آنکھوں میں

ہوں تیر بلا کا میں نشانہ

شمشیر جفا کا میں سپر ہوں

یاں تغافل میں اپنا کام ہوا

تیرے نزدیک یہ جفا ہی نہیں

یوں خدا کی خدائی برحق ہے

پر اثرؔ کی ہمیں تو آس نہیں

غم کو با غم بہم نہ کیجے

گر غم ہے تو غم کا غم نہ کیجے

تم جور و جفا کرو جو چاہو

ان باتوں پہ کب مجھے نظر ہے

تیرے وعدوں کا اعتبار کسے

گو کہ ہو تاب انتظار کسے

گو زیست سے ہیں ہم آپ بیزار

اتنا پہ نہ جان سے خفا کر

اب غیر سے بھی تیری ملاقات رہ گئی

سچ ہے کہ وقت جاتا رہا بات رہ گئی