Aankh Shayari

merī aañkh band thī jab talak vo nazar meñ nūr-e-jmāl thā

khulī aañkh to n ḳhabar rahī ki vo ḳhvāb thā ki ḳhayāl thā

meri aankh band thi jab talak wo nazar mein nur-e-jmal tha

khuli aankh to n KHabar rahi ki wo KHwab tha ki KHayal tha

hai vaj.h koī ḳhaas mirī aañkh jo nam hai

bas itnā samajhtā huuñ ki ye un kā karam hai

hai wajh koī ḳhas mirī aañkh jo nam hai

bas itnā samajhtā huñ ki ye un kā karam hai

dil vahī dil hai jo allāh kā jalva dekhe

aañkh vo aañkh jo qudrat kā tamāshā dekhe

dil wahi dil hai jo allah ka jalwa dekhe

aankh wo aankh jo qudrat ka tamasha dekhe

jaan se ho ga.e badan ḳhālī

jis taraf tū ne aañkh bhar dekhā

jaan se ho gae badan ḳhālī

jis taraf tū ne aañkh bhar dekhā

shab-e-vasl kyā muḳhtasar ho ga.ī

zarā aañkh jhapkī sahar ho ga.ī

shab-e-wasl kya muKHtasar ho gai

zara aankh jhapki sahar ho gai

supne meñ aañkh piyā sañg laagī

chauñkī paḌī phir soi na jaagī

supne mein aankh piya sang lagi

chaunki paDi phir soi na jagi

jis aañkh ne dekhā hai us aañkh ko dekhūñ

hai us ke sivā kyā tere dīdār kī sūrat

jis aankh ne dekha hai us aankh ko dekhun

hai us ke siwa kya tere didar ki surat

lagā kar aañkh us jān-e-jahāñ se

na hogā ab kisī se āshnā dil

laga kar aankh us jaan-e-jahan se

na hoga ab kisi se aashna dil

na kisī kī aañkh kā nuur huuñ na kisī ke dil kā qarār huuñ

kisī kaam meñ jo na aa sakī maiñ vo ek musht-e-ġhubār huuñ

na kisi ki aankh ka nur hun na kisi ke dil ka qarar hun

kisi kaam mein jo na aa saki main wo ek musht-e-ghubar hun

vo chhup gaye to aañkh se taare nikal paḌe

dil gum huvā to ashk hamāre nikal paḌe

wo chhup gaye to aankh se tare nikal paDe

dil gum huwa to ashk hamare nikal paDe

vo aañkh mere liye nam hai kyā kiyā jaa.e

use bhī aaj mirā ġham hai kyā kiyā jaa.e

wo aankh mere liye nam hai kya kiya jae

use bhi aaj mera gham hai kya kiya jae

aañkh milte hī kisī ma.ashūq se

phir tabī.at kyā sambhālī jā.egī

aankh milte hi kisi mashuq se

phir tabiat kya sambhaali jaegi

hijāb-e-ruḳh-e-yār the aap hī ham

khulī aañkh jab koī pardā na dekhā

hijāb-e-ruḳh-e-yār the aap hī hum

khulī aañkh jab koī pardā na dekhā

kahīñ hai aañkh āshiq kī kahīñ dīdār-e-janāñ hai

bahār-e-husn-e-tābāñ meñ tū hī tū hai tū hī tū hai

kahin hai aankh aashiq ki kahin didar-e-janan hai

bahaar-e-husn-e-taban mein tu hi tu hai tu hi tu hai

sayyāñ sañg kas morā laago nayanvā

aañkh lagat nahīñ niiñd paḌat nahīñ

sayyan sang kas mora lago nayanwa

aankh lagat nahin nind paDat nahin

be-hijābāna vo sāmne aa ga.e aur javānī javānī se Takrā ga.ī

aañkh un kī laḌī yuuñ mirī aañkh se dekh kar ye laḌā.ī mazā aa gayā

be-hijabana wo samne aa gae aur jawani jawani se Takra gai

aankh un ki laDi yun meri aankh se dekh kar ye laDai maza aa gaya

aah jis din se aañkh tujh se lagī

dil pe har roz ik nayā ġham hai

aah jis din se aañkh tujh se lagī

dil pe har roz ek nayā ġham hai

aañkh un kī phir ālūda-e-nam dekh rahā huuñ

ḳhud par unheñ mā.il-ba-karam dekh rahā huuñ

aankh un ki phir aaluda-e-nam dekh raha hun

KHud par unhen mail-ba-karam dekh raha hun

har aañkh kī til meñ hai ḳhudā.ī kā tamāsha

har ġhuncha meñ gulshan hai har ik zarrā meñ sahrā

har aankh ki til mein hai KHudai ka tamasha

har ghuncha mein gulshan hai har ek zarra mein sahra

apnā banā ke ai sanam tum ne jo aañkh pher lī

aisā bujhā charāġh-e-dil phir ye kabhī jalā nahīñ

apnā banā ke ai sanam tum ne jo aañkh pher lī

aisā bujhā charāġh-e-dil phir ye kabhī jalā nahīñ

gar kahīñ us ko jalva-gar dekhā

na gayā ham se aañkh bhar dekhā

gar kahīñ us ko jalwa-gar dekhā

na gayā hum se aañkh bhar dekhā

us dar-e-faiz se ummīd bañdhī rahtī hai

aur madīna kī taraf aañkh lagī rahtī hai

us dar-e-faiz se ummid bandhi rahti hai

aur madina ki taraf aankh lagi rahti hai

azal se abad tak kabhī aañkh dil kī

na jhapke jhapakne na paa.e to kyā ho

azal se abad tak kabhi aankh dil ki

na jhapke jhapakne na pae to kya ho

khol aañkh apnī dekh ayaañ haq kā nuur hai

har barg va har shajar meñ usī kā zuhūr hai

khol aankh apnī dekh ayan haq ka nur hai

har barg wa har shajar mein usi ka zuhur hai

lene vaale apnī āñkhoñ se lagā lete haiñ use

aañkh kā taarā hai sañdal hazrat-e-maḳhdūm kā

lene wale apni aankhon se laga lete hain use

aankh ka tara hai sandal hazrat-e-maKHdum ka

tū usī kī aañkh kā nuur hai tū usī ke dil kā surūr hai

ki jise buland nazar milī ki jise shu'ūr-e-vilā milā

tu usi ki aankh ka nur hai tu usi ke dil ka surur hai

ki jise buland nazar mili ki jise shu'ur-e-wila mila

is se pahle aañkh kī putlī kī kyā auqāt thī

tere nuqta dete hī kyā kyā nazar aane lagā

is se pahle aankh ki putli ki kya auqat thi

tere nuqta dete hi kya kya nazar aane laga

milkar aañkh dil lenā hai bā.yeñ haath kā kartab

sivā is ke bhare haiñ be-shumār asrār āñkhoñ meñ

milkar aankh dil lena hai bayen hath ka kartab

siwa is ke bhare hain be-shumar asrar aankhon mein

aise niThur se kaam paḌo hai

aañkh lagā.ye maiñ jī so ga.ī

aise niThur se kaam paDo hai

aankh lagaye main ji so gai

nahīñ aañkh jalva-kash-e-sahar ye hai zulmatoñ kā asar magar

ka.ī āftāb ġhurūb haiñ mire ġham kī shām-e-darāz meñ

nahin aankh jalwa-kash-e-sahar ye hai zulmaton ka asar magar

kai aaftab ghurub hain mere gham ki sham-e-daraaz mein

kaahe tū mose aañkh churāvat

sanmukh tore maiñ aapai n hūñgī

kahe tu mose aankh churawat

sanmukh tore main aapai n hungi

tūfān tanik suman kī bū meñ

samandar ek aañkh ke anjo meñ

tufan tanik suman ki bu mein

samandar ek aankh ke anjo mein

aañkh khol dikhte 'kāzim' kaañ

uTh gare laago kañvar kanhā.ī

aankh khol dikhte 'kazim' kan

uTh gare lago kanwar kanhai

jab se lagī hai aañkh bhī merī lagī nahīñ

ye ātish-e-firāq hai rahtī dabī nahīñ

jab se lagi hai aankh bhi meri lagi nahin

ye aatish-e-firaq hai rahti dabi nahin

kyā mirī aañkh adam biich lagī thī ai charḳh

kyā us ḳhvāb se tū ne mujhe bedār abas

kya meri aankh adam bich lagi thi ai charKH

kya us KHwab se tu ne mujhe bedar abas

jab so gaye tum aañkh lagā.e

kaise ‘turāb’ piyā ko bhūlūñ

jab so gaye tum aankh lagae

kaise ‘turab’ piya ko bhulun

nahīñ kholte aañkh kyuuñ 'benazīr'

vo aatā hai koī udhar dekhiye

nahin kholte aankh kyun 'benazir'

wo aata hai koi udhar dekhiye

haañ ye sarshāriyāñ javānī kī

aañkh jhapkī hī thī ki raat ga.ī

han ye sarshaariyan jawani ki

aankh jhapki hi thi ki raat gai

baḌī chiiz aañkh hai insān pahle aañkh pahchāne

nazar kā taaḌ jaanā bhī to aadhī 'aib daanī hai

baDi chiz aankh hai insan pahle aankh pahchane

nazar ka taD jaana bhi to aadhi 'aib dani hai

shrī varshbhānu kishorī re logo

morī to aañkh turāb so laagī

shri warshbhanu kishori re logo

mori to aankh turab so lagi

kitne kam-zarf duniyā meñ vo log haiñ ik zarā ġham milā aañkh nam ho ga.ī

ġham bhī allāh kī ik baḌī den hai hauslā chāhiye zabt-e-ġham ke liye

kitne kam-zarf duniya mein wo log hain ek zara gham mila aankh nam ho gai

gham bhi allah ki ek baDi den hai hausla chahiye zabt-e-gham ke liye

nigāh vāloñ meñ us kā koī shumār nahīñ

ġham-e-husain meñ jo aañkh ashk-bār nahīñ

nigah walon mein us ka koi shumar nahin

gham-e-husain mein jo aankh ashk-bar nahin

har aañkh ko hai tirī tamannā

har dil meñ tirī hī aarzū hai

har aankh ko hai teri tamanna

har dil mein teri hi aarzu hai

aañkh un se milā ke dekh liyā

ham ne jaadū jagā ke dekh liyā

aankh un se mila ke dekh liya

hum ne jadu jaga ke dekh liya

aañkh jo dekh ho ga.e maġhrūr

dil pukārā hanūz dillī duur

aankh jo dekh ho gae maghrur

dil pukara hanuz dilli dur

vo aañkh kyā hai jis ko tirī justujū na ho

vo dil hī kyā hai jis meñ tirī aarzū na ho

wo aankh kya hai jis ko teri justuju na ho

wo dil hi kya hai jis mein teri aarzu na ho